Read Hrangkhol INPÂKNA HLAHAI 18 Bible Online

INPÂKNA HLAHAI 18 - Hrangkhol bible

INPÂKNA HLAHAI 18

¹O RENGPA, ki hrâtna lung nang ki thung.

²RENGPA chu ki lungpui le, ki kulpui le ni saninzôktu a ni; Ki Pathian, ki lungpui dettak a nia, amaa khan iamna irnghat ki ti; ki phô le, ki saninhringna irki le, ki kulpui irsâng a ni.

³Inpâk ruk RENGPA chu koi ki ta, Khanchu a ni doituhai ata saninhringin om ki ti.

⁴Thina hruihrualhaiin a ni zêla, Pathian ngaisak loina tui lianhai khan a nin chitira.

⁵Seol hruihrualhai khan a ni khit phiara, thina chânghai khan a nin ôka.

⁶Ki lunginzîngin RENGPA chu ki koi ngaia, ki Pathian kin sam ngai. Ama’n chu a biak in ata ki’rhâi an hriat ngaia, A makunga ki khêk irhâi chu a mikuara a lût tâka.

⁷Kha zoro lai khan irnêng hi an hnînga, an thing tâka.

⁸A hnâr ata meikhu an ding ngut ngut tâka, A bâia suak mei khan a kâng zuak zuak tâka, Kha khan meihol khom a’raltir zur zur tâka.

⁹Ama khan irvânhai khom an kûntira, a chum tâka: A ke hnuaia khan inthim irsa khak hi a oma.

¹⁰Cherub chunga a chuanga, a vuang tâka. A ni, phâivua irthahaia khan a vuang mur tâka:

¹¹Inthim hi ama irbîkna hmunin, ama irthupna dângdi tîn a sina; Sûm irsa tak tuia sip khan a hual vêla.

¹²Ama vârna sika khan a sûm irsâkhak kha ar kianga, Irialhai le mei irlinghai a tâk mur mura.

¹³RENGPA chu irvânhaia khin ar sê lul lula, Anchungtaka khan ar hâi a suaka, Irialhai le mei irlinghai a tâk sup sup tâka.

¹⁴Khan, a thalhai kha a kâp suaka, annihai kha an darhtirhaia; A ni, kôlhai a’rtêktir zor zor saa, an buaitirhai chit tâka.

¹⁵Kha tika chu, O RENGPA, ni halna sikin, Ni hnâra phûk suak khan a sêm rak sika khan, Tui luangnahai a hong inlanga, Irnêng irnghatnahai kha inlangin a om tâka.

¹⁶Ama khan chung tiang ata a zuang inbana, a ni chela: Tui tamtak ata a ni hnûk suaka.

¹⁷A ni doitu hrât tak ata a ni saninzôka, A ni khôkmâktuhai ata khom; keima hrangin chu an hrât ta hraia.

¹⁸Anni khan ki vânduai nî khan an ni beia, Khannisianlân RENGPA chu ki irnghatna tak a ni.

¹⁹Ama khan hmun irthôl taka a ni hruai suaka; Ki chunga a lôm sikin a ni isaninzôk tâk a ni.

²⁰RENGPA khan ki fel lam ang takin ki chunga a thoa, Ki kuthai a irthianginfâi lam ang takin a ni thuan a ni.

²¹RENGPA lampuihai kha ki zuia, Ki Pathian kuang ata sual takin rotsan ngai ma unga.

²²A roirêlna murdi ki makunga a om ngaia, A thu’nkunghai kha pai ngai ma unga.

²³Ama ata sêlnaboi ki ni saa, Ki porinchêna ata ki’rkhâipai ngaia.

²⁴Khasikin RENGPA khan ki felzia ang takin a ni thuan tâka, Ki kuthai a mithmua a irthiangzia ang dênin.

²⁵Mi lunginkham thei tak ata chu lungkham thei takin inlangtir ni ta; Mi sa famirkip ata khan sa famirkipin inlangtir a ta;

²⁶Mi irthianghai ata kha irthiangin inlangtir ni ta; Khan, mi tukullian ata chu tukullian inlangtir ni ti.

²⁷Intak tuang mihai chu ni isaninhring hrang a nia; Mi lârirpâkhai chu irhniamtir ni ti.

²⁸Nangin ki meiser hi ni hâl pe ni ta; RENGPA ki Pathian khan kin thimna hi nin vârtir a ti.

²⁹Nangma changpuiin râlhai kin boa; Ki Pathian changpuina dênin kul bang ki’rchôm khum a ni.

³⁰Pathian chu, a lampui kha a sa famirkipa; RENGPA thu kha chu a fia tâka; Amaa iamna irnghat murdihai ta hrangin chu ama kha phô a ni.

³¹RENGPA ti no chu tu mo Pathian dang an iom? Ki Pathian ti no chu tu mo lungpui om?

³²Hrâtnaa ni’rthuamtu le, ki lampui nin sa irkiptu Pathian chu.

³³Ama khan ki ke hi sazukpui ke angin a siama; Ki hmun irsâng takhaia a nin omtir ngaia.

³⁴Ki kuthai hi râl kâp hrangin ar chutir ngaia. Khanchu ki bânhai hin dâr thal ngul an kûi zôi raka.

³⁵Nangin ni saninhringna phô ni ni pêk saa: Ni kut chang tiang ni ni kaia, Ni irngaiintômna’n a ni siam inlian ta.

³⁶Ki hnuaia ki ke pêtna kha ni’rzattira, Khanchu ki kehai hi tung mah.

³⁷A ni doitu irzûl ki ta, irzûl phâ ki ti: Irhmangtira an om mâka chu hong kîr ta no ning.

³⁸A thoinôk thei loina hrangin sât inbong ki ta; Ki ke hnuaia hin irtet intam an ti.

³⁹Nangin irbeina hrangin kha hrâtna’n ki konga ni ni khita: A ni hong beituhai kha ki hnuaia an inrîl zoi tâka.

⁴⁰A ni khôkmâktuhai chu kin boitirhai theina hrangin. Nangin a ni doituhai chu hnung songsanin nin omtir tâka.

⁴¹Annihai kha an khêka, khannisianlân, a san hrang tûte om mahai; RENGPA dên kha an insama, khannisianlân sâmhai mah.

⁴²Kha tena chu bâli phâivua’n a isêm inlêng ang khan ki zêm irnôi chita: Kholaia dialdôk ang dênin ki pai tâka.

⁴³Nangin mihai irsualna ata ni ni saninhringa; Nam tin lua ni ni siama: Ki inhriat ngai loi mihai khan ki sintho ta an ti.

⁴⁴Ki thurchi an inhriat zoi le ki thu zôm an ti: Mikhualhai kha ki kuang irpe lût an ti.

⁴⁵Mikhualhai kha lâizâm tho an ta, An kulpui ata kha inthing pumin hong suak an ti.

⁴⁶RENGPA kha a hring mai kêng; ki lungpui kha inpâkin om sianlân; A ni saninhringtu Pathian kha chôiindômin om ri se:

⁴⁷Phuba ni lâk petu le, Mi tin ki hnuaia setu Pathian ngêt kha.

⁴⁸Ama khan a ni doituhai ata a ni sansuaka: A ni, nangin a ni beituhai chung tiang ni ni chôi irkânga: Mi nunrông ata kha ni ni saninzôk ngaia.

⁴⁹Khasikin, O RENGPA, nam tin laia khan lômthu insîr ki ta, Ni’rhming inpâkin zâi ki ti.

⁵⁰Ama khan chu saninhringna roiinpui tak rêng a isiam kuang a pêk ngaia; A sahriak poltu chunga, Davida le ar chihai chung ngeia khan, kumkhua’n a lungkham lianzia inlangtir a ti.