Read Hrangkhol INPÂKNA HLAHAI 22 Bible Online

INPÂKNA HLAHAI 22 - Hrangkhol bible

INPÂKNA HLAHAI 22

¹Ki Pathian, ki Pathian, ithoa mo ni ni irotsan? Ithoa mo ni changpui hrangin ni hla bâka? Kin hrûmna thuhai ata ni ihla hi?

²O ki Pathian, sûna nang kin sama, Khannisianlân ni sâm mak chea; Zâna khom nang kin sama, dâihrek ual ma ung.

³Khannisianlân, o nang Israelhai inpâknaa om ngai, Nang chu ni irthiang a ni.

⁴Kin irchibulhai khan nang an lei iama: An iama, khanchu nangin ni lei saninzôk ngai.

⁵Nang an insama, khanchu saninzôkin an lei om ngaia: Nang an iama, khanchu mualinphoiin om ngai mahai.

⁶Kei rêk chu mihriam rêng rêng ni ma ung, chokchonâl chian ki nia; Mihriamhai hrilinsiat le mihai ihmusit ki ni.

⁷A ni hmupu dôrin an nin nuisana: An hner an phena, an lu an nok ngaia,

⁸“RENGPA chunga irnghat ro ba, ama khan ama hi saninzôk no ni mo: A chunga a lôm sikin saninzôk no ni mo,” an tia.

⁹Nang chu sul ata ni lâksuaktu kha ni nia: Ka nu irhnuhai chunga ki om lai khan nangin ni nin iamtira.

¹⁰Sula irthokin nangma chunga irnghat ki ni, nang chu ka nu’n a ni vong lai ata ki Pathian ni ni.

¹¹Ni hla viat no roh: lunginzîngna hrang anai ta; changpuitu hrang rêng rêng om mahai.

¹²Sehrâtchal tamtakin an nir hual vêla: Basan rama sehrâtchal hrât takhaiin an nir hual vêla.

¹³Kâmkeibaknei hnuk hrôt inrûm hmang angin a bâiin an ni âng khuma.

¹⁴Tui anga bunpaiin ki oma. Ki ru murdihai khom irphêtin a oma: Ki milung hi khuaihlu angin a zôi zoi ta.

¹⁵Ki hnuk hi pil bêl angin a chârkhohroi zoi ta, “Ki milei khom ki danga a kop khak tâka; Nangin thina pila hin ni ni ihruai inlût tâk a ni.

¹⁶Uihaiin an ni’rhual vêla: Thil saloi thotu om khômhai khan an ni’rhual khaka; Ki kut le kehai hi an inphopa.

¹⁷Ki ru murdihai hi ki tep theia; Anni lakin ni enin anni êroa.

¹⁸Ki puansilhai an irsema, Ki songkol hrangin tâ an sâna.

¹⁹Nangma’n chu O RENGPA, ni hla viat no’n lân: O, a nin hrâttu, ni changpui hrangin irhnot roh.

²⁰Ki hringna hi khandai ata saninzôkin lân; Ki hringna hi uihai sinthotheina ata kha saninzôk roh.

²¹Kâmkeibaknei bâia om chu ni saninzôk inlân; A ni, Sele irkia om chu ni sâm roh.

²²Ki urênghai kuang nir hming hril ki ta: Inkhômhai laia nang inpâk ki ti.

²³RENGPA chituhaio, ama kha inpâk roi; Jakoba irchi murdihaio, ama kha chôiindôm roi; Israela irchi murdihaio, ama kha chi roi.

²⁴Ama khan intak tuangtu intakzia kha hmusit maka, intir ual mah; A hmâi kha ama ata thup ual mah; Ama kha a khêkin ar ngai ngai.

²⁵Inkhômna roiinpui taka nang ki inpâk ngaina hi nangma kuanga om a ni: Ama chituhai makunga khan ki thu’nkung sua tum ki ti.

²⁶Thuhnuairôlhai khan fâ an ta, khop an ti: Ama zongtuhai khan RENGPA kha inpâk an ti: Nin milung chu kumkhua’n hringin om ri se.

²⁷Kôlkunga mi murdi khomin inhre nôk an ti, RENGPA tiang irhei ta an ta: Nam tin chi tin ni makunga kûn an ti.

²⁸Ram chu RENGPA ta a nia: Nam tin chunga roirêltu a ni.

²⁹Irnênga mi nei intam murdihai khan fâkin chubai mûk an ti: pila chum hrang murdihai chu a makunga la kûn an ti. Mâni hringna inhring mai thei loi chu.

³⁰Thoiintharhaiin a sintho an ti; Thoiinthar hong om thiaihai kuang khan RENGPA thurchi kha hril an ti.

³¹‘RENGPA’N a mihai a saninzôk,’ tiin la’rzir hranghai hril an ti.