Read Hrangkhol INPÂKNA HLAHAI 29 Bible Online

INPÂKNA HLAHAI 29 - Hrangkhol bible

INPÂKNA HLAHAI 29

¹O mi sinthothei tak nâihaio, RENGPA kuang pe unglân; RENGPA kuanga khan roiinpuina le hrâtna pe roi.

²RENGPA kuang ar hming roiinpuina chu pe unglân; Irthiang satna irbelin RENGPA chu chubai mûk roi.

³RENGPA hnukirhâi kha tui chunghaia khan a hong oma, roiinpui Pathian kha a hong irse mur mura, RENGPA ngei kha tui tamtak chunghaia ar hâi a hong oma.

⁴RENGPA hnukirhâi chu sinthothei tak a nia; RENGPA hnukirhâi kha chu roiinpui tak a ni.

⁵RENGPA hnukirhâi khan sidar thinghai kha inkhiaktir a ta; A ni, RENGPA khan Lebanon tânga sidar thinghai kha an khiaktir sep sup ngai.

⁶Sehrâtte tual chai angin a om ngaia; Lebanon le Sirion tânghai chu sele tê ang dênin.

⁷RENGPA hnukirhâi khan kôl a’rtêktira.

⁸RENGPA hnukirhâi khan ramchâr an tor inhnînga; RENGPA khan Kades ramchâr kha an hnîngtir ngai.

⁹RENGPA hnukirhâi khan seso thing kha an hnîngtira, rampui thinghnahai chu an chiltir ving ngaia: A biak ina khan thil itinrêngin, “A roiinpui e,” an ti seng ngai.

¹⁰RENGPA chu tuisânglian lai khan rêngin a toia, A ni, RENGPA chu kumkhontuanga hrangin Rêngin a itoi a ni.

¹¹RENGPA khan a mihai kuang hrâtna pehai a ta, RENGPA khan a mihai kha irtharngamna’n satvurhai a ti.