Read Hrangkhol INPÂKNA HLAHAI 31 Bible Online

INPÂKNA HLAHAI 31 - Hrangkhol bible

INPÂKNA HLAHAI 31

¹O RENGPA, nangmaa khan ki iamna ki’rnghat ngaia; Itika khom mualinphoiin nin omtir no’n lân: Ni felna sikin ni saninzôk roh.

²Keima tiang hin ni mikuar zuang do’n lân; ni saninzôk lat roh:

³Nang chu ki lungpui le ki kulpui ni nia; Khasika khan nir hming sikin ni hruaiin ni kai roh.

⁴Kin ôkna hranga inrûka lên an idâp ata hin ni hnûk suakin lân, Nang chu ki kulpui ni ni.

⁵Ni kuta ki’rtha kin koltir e: O RENGPA, thutak Pathian, nangin ni nir tan tâka.

⁶Thil ite ni loi millim uksakna chu ki khôkmâka; Keima rêkin chu RENGPA ki iam a ni.

⁷Ni lungkham lianna sika hin ki râi a fânin lôm ki ti: Ki lunginzîngna hi ni hmu ngaia; Ki hringna hi intakhai lai khomin nin hriat ngai.

⁸Khan, a ni doituhai kuta nangin ni khum mak chea; Ki ke hi hmun irthôl taka ni’rnghat pe tâka.

⁹O RENGPA, lung nin khamin lân, Chardongin ki oma: Ki beidongna sikin ki mit dolde a suak tîr tîra, A ni, ki hringna le ki taksa dênin.

¹⁰Ki hring sûnghai hi beidongin a hek tâka, Ki kumhai hi inrûmin a hek sa tâk a ni: Ki zâmirzalna sikin ki’rnak a chuaia, ki ruhai khom an rôp zoi ta.

¹¹A ni doituhai sikin ki’rhming hi a siat zoi tâka, A ni, ki bômhai ata hi a sate’n a siat tâk a ni, ki hmêl hriathai hrang khomin ichiomtak ki ni tâka: Kholaia ni nghâkhai khomin an nin tânsan tâka.

¹²Mithi an irnghil ang takin irnghilin ki oma: Bêl koi ang chian ki ni ta.

¹³Mi tamtak ni hnôlna kin hriata, ki kôlvêla ichiom a om kha; ki siatna hranga an ngaitua lai khan, Ki hringna hi lâkpai an tuma.

¹⁴Khannisianlân, O RENGPA, nang ki iama: “Ki Pathian ni ni,” ki tia.

¹⁵Ki zorohai kha ni kuta a oma: A ni doituhai kut ata le, deng nin theitirtuhai ata hi ni saninzôk roh.

¹⁶Ni hmêlin ni siahlo hi zuang in-êlin lân; Ni lungkham lianna sikin ni saninhring roh.

¹⁷O RENGPA, mualinphoiin nin omtir no’n lân; nang ki koia. Mi siahai kha mualinphoiin omhai sianlân, Seol-ah dâihrekin om ri sehai.

¹⁸Hmûr milaktheihai kha chongthei loiin om ri sehai; Khahai khan lârirpâk takin mi fel an hrilsiat ngai.

¹⁹O, ni satna, nangma chituhai hrangin ni ibukkhôm kha, a roiinpui bâka! Mihriam nâihai mithmua nangmaa iamna irnghathai hranga a itho pe kha.

²⁰Anni kha mihriam hnôlna ata khan ni saninzôkna mithmua thuppai ni a ti:

²¹RENGPA chu inpâkin om ri se: A lungkham lianzia irkhêl tak kha khopui det taka ni nin hmutira.

²²Keima lakin chu, ki lunginzîngin, “Ni mithmu ata pai irhmangin ki om ta,” Ki lei ti tâka, khannisianlân nang ki koia khan, ki inghina hnukirhâi kha ni lei inhriata.

²³O, a mi irthiang murdihaio, RENGPA chu lungthung roi: RENGPA’N chu mi iamom chu a saninzôka, Lârirpâk taka thotu chu a saterengin ni thuan ngai.

²⁴RENGPA sabei murdihaio, Hrât takin om unglân, nin milung chu inhâitir roi.