Read Hrangkhol INPÂKNA HLAHAI 32 Bible Online

INPÂKNA HLAHAI 32 - Hrangkhol bible

INPÂKNA HLAHAI 32

¹A tho’nchâina ngaidama oma, a sualna irhlîkhua omna chu, an vân a sa.

²Mi, RENGPA’N pualoina neia inkung loia, A hringnun dikloina rêng rêng om loi chu a vân a sa.

³Ki sual ki thup chian laia khan, sûn sôta kin hrûmnaa khan ki takpum hi a irzal zoi tâk a ni.

⁴RENGPA, a sûn a zânin ni ni sepna kutin a ni dela; Kholum misa’n thinghna a inthêmtir chûl ngai ang khan ki hrâtna khom a hong irzal tâk a ni.

⁵Khanchu ki sualna chu ni kuang kin puanga; Kin châina chu thup ta ma unga, “Ki tho’nsualna chu RENGPA kuang thûtpha chôi ki ti,” ki tia; Khanchu nangma’n ki sual porinche chu ni ni ngaidam ta.

⁶Khasikin, Pathian ngaisak mi murdi’n hmu ola ni om laiin ni kuang chongchai ri se; buaina tuilian chu ngîm phâk no ni.

⁷Nang chu ki’rbîkna hmun ni nia; Nangma’n lungzîngna ata ni sansuak ni ta, Saninzôkna hlahaiin nir hualtir ni ti.

⁸“Ni fena hrang lampui chu nang irhmutirin, nang irchutir ki ti, Ki mitin nang en maiin nang changpui ki ti.

⁹Ngaituana neiloi sakor mani, Sakuartung mani ang khan om no roh; Khahai khan sepna’n lakam thîr an innanga, khano’nchu ni thu zôm thei no nihai,” a tia.

¹⁰Mi sia ta hranga khan dengtheina tamtak a oma; RENGPA iamtu rêk chu lungkham lianna’n hual vêl a ti.

¹¹Mi felhaio, RENGPAA khan raifânin lôm unglân, Lungrîl diktak irputin raifânin khêk roi.