Read Hrangkhol INPÂKNA HLAHAI 33 Bible Online

INPÂKNA HLAHAI 33 - Hrangkhol bible

INPÂKNA HLAHAI 33

¹O, mi felhaio, RENGPAA khan raifânin zâi roi: Mi dik ta hrangin chu Pathian inpâk hi a irhoi a ni.

²Serânda’n RENGPA kuanga khan lômthu insîr unglân: Perkhuang hrui sôm nei leh ama inpâkin zâi roi.

³Ama chôiindômin hla thar sak unglân; A satêna irhâihoi le thiam takin tum roi.

⁴RENGPA thu chu a dika; A sintho murdi chu iamom taka tho a ni ngai.

⁵Felna le roirêlna fel hi a’rngaiinhlu ngai. Irnêng hi RENGPA lungkham lianna’n a sipa.

⁶RENGPA irchamin irvânhai chu siam a nia; Khaanga omhai murdi khom kha a bâia phûk khan siam an ni sa.

⁷Ama khan tuikhanglian tuihai chu hmun khata a bukkhôma: Tui inthûk takhai chu siana hmun inhaia a siam sa ngai.

⁸Irnêng lua murdi’n RENGPA chu chi sianlân: Rammuala om murdi’n ama chiin om ri sehai.

⁹Ama khan chongin a tia, a hong om indet tâka; Thu a pêka a hong om indet tâka.

¹⁰RENGPA’N nam tinhai thiltum chu hmang hmunboi an chang pehaia; Mi tin ngaituanahai chu ite inlâpna boiin a siam pehai ngai.

¹¹RENGPA inkung chu kumkhua’n om indet a ta, A milunga a ingaituanahai chu irlo tin tin dênin om indet a ti.

¹²RENGPA Pathiana nei namhai chu an vân a sa e; Ama irchon hranga a inthang mihai chu.

¹³RENGPA’N chu irvâna irthokin a thîra, mihriam nâihai murdi hi a hmu ngai.

¹⁴Irnênga om murdi hi a omna hmun ata a zuang thîr ngai.

¹⁵An rênga milunghai siama, an sintho murdi ngaitua ngaitu khan.

¹⁶Reng tin tin hi a sipaihai tam sik ringota saninzôkin om ngai mahai; Mi hrât khom a hrât sik ringotin inzôk ni ual ngai mah.

¹⁷Zôkna hrangin sakor hi ite ni mah. A sân a hrât sikin tukhom saninzôk sa no ni.

¹⁸Irngai ta, RENGPA mit chu ama chituhai chunga a chum mai ngaia, a lungkhamna sabeituhai chunga khan;

¹⁹An hringna kha thina ata saninzôk hrang le, châm tâk tika anni irdonsuina hrangin.

²⁰Ei hringna hin RENGPA a nghâk maia, ama kha ni changpuitu le ei phô a ni.

²¹Amaa khan ei milung hi raiinfân a ta, A’rhming irthiang ei iam sikin.

²²O RENGPA, ni lungkhamna kha kin chunga om ri se, Ei isabei ang takin.