Read Hrangkhol INPÂKNA HLAHAI 35 Bible Online

INPÂKNA HLAHAI 35 - Hrangkhol bible

INPÂKNA HLAHAI 35

¹O RENGPA, a ni beituhai chu nangin beiin lân: A ni doituhai chu nangin doi roh.

²Pho chîn le pho lian chelin lân, Ni changpui hrangin ngîr roh:

³Ufei khom phôiin lân, a ni’rzûltuhai lampui lei khâlin lân: Ki hringna kuang hin, “Nang a saninhringtu ki ni kêng,” ti roh.

⁴Ki hringna inboi tuma zongtuhai chu, mualinphoitira inzaktirin omhai sianlân: A nin siatna hrang irngaituatuhai chu, inrottirin chamai rakin om ri sehai.

⁵RENGPA vântirtônin chalai maiin, Farsi phâivua isêmpai angin om ri se.

⁶RENGPA vântirtôn irzûl maiin, An lampui chu inthim tak le irnâl tak ni ri se.

⁷A bi om loiin nin ôktirna hrangin an lênhai kha khurpadopa inrûkin an dâpa, A bi om loiin ki hringna tâkna hrangin khurpadop an choia.

⁸A’rtûng no kârin siatna a chunga tung sianlân; Inrûka a lên lei dâpa ngei khan ama ngei in-ôk sianlân: kha khan tâk siat ri se.

⁹Khanchu ki hringna hi RENGPAA khan raiinfân a ta: A saninhringnaa khan lôm a ti.

¹⁰Ki ru murdi hin, “RENGPA, mi’nriang, a doi inhnê loi ata saninzôktu, A ni, inriang le invâia, ama insiat ngaitu ata saninzôktu, nangma ang hi tu mo an om?” ti an ti.

¹¹Inhretu felloi takhai hong thoi an ta; Ki thil inhriat loi thuhaia khan khua an ni sâla.

¹²Ki hringna hin thil inchân hrang dôrin thil sa thil sualin a ni thuana.

¹³Keima’n chu an dam no’n bora ki sila: Bu ki ngheia, kûn chian chianin ki chongchaia.

¹⁴Urêng hrangin mani, rual hrangin mani anga ni irhoi takin: Lusûn ang dêna kûnin ki’rvêl, ki’rvêla, Mâni nu sûn ang dênin.

¹⁵Khannisianlân keima ki’rtetin chu an lôma, an inkhômpui rak a ni: Mi sual mai maihai chu ni bei hrangin an irbuka kha kha lei inhre ma unga; Bâng nuam loiin an ni soisak bita:

¹⁶Hruaithênaa nuiza tufiam insîrtuhai ma mai angin: An irkam an ni nôi khuma,

¹⁷RENGPA, nangin idôr ten mo en ni ta? Ki hringna hi insiat an tumnahaia khan sansuakin lân, Ki ineisun tak hi kâmkeibakneihai ata khan sansuak roh.

¹⁸Inkhômna roiinpui taka khan lômthu nang hril ki ta: Mi tamtak laia nang inpâk ki ti.

¹⁹Ki râlhai khan dikloi takin nin riam no ri sehai: Ite ni loia ni khôkmâktuhai chu an mitin irbiak no ri sehai.

²⁰Irngeina thu zel hril mahaia: Hi rama om chi chianhai huangna thuhai an suangtua ngai a ni.

²¹A ni, an bâiin an nir kôk mura; “Kha! kha! kin mitin kin hmu ta,” an tia.

²²O, RENGPA, nangin ni hmua, dâisanhrekhai no roh: O, RENGPA, ni hla viat no roh.

²³Ki Pathian le ki RENGPA ki roirêl hrangin, A ni, ki thua ni thop hrangin, harin lân, meng roh.

²⁴O RENGPA ki Pathian, ni felna sikin roi ni rêlin lan; Anni khan nin riam ta no ri sehai.

²⁵An lungrîl khan, “Kha! khaang kha kêng kin inuam,” ti ta no ri se: “Ama kha ei inlem zoi ta,” ti ta no ri sehai.

²⁶Ki siatna chunga lômhai chu mualinphoi tak le chamai takin om ri sehai.

²⁷Ki felna chunga lômhai chu râifâna khêkin lôm takin omhai sianlân: A ni, “A siahlo vânneina chunga lôm ngai RENGPA chu chôiindômin om ri se.

²⁸Khanchu, ki milei hin felna thu insîr a ta, Nang an pâkna thu khom sûn sôtin insîr sa a ti.