Read Hrangkhol INPÂKNA HLAHAI 37 Bible Online

INPÂKNA HLAHAI 37 - Hrangkhol bible

INPÂKNA HLAHAI 37

¹Thil saloi thotuhai sikin beiindong no’n lân, Fel loitaka thohai chu irzuk no roh.

²Hloisûl anga tûkin om lat an ta, Sûlhring angin an ithêm hrang a ni.

³RENGPA chu iamin lân, thil sa tho roh, Hi rama hin omin lân, iamomna irzûl mai roh.

⁴RENGPA chunga khan lôm sa roh; Khanchu ni milung nuamlamhai kha nang pe a ti.

⁵Ni om lam hrang chu RENGPA chunga irnghatin lân; Ama chu iamin lân, ama’n tho zit a ti.

⁶Ni felzia chu vâr angin insuaktir a ta, Ni thiam changzia khom sûnlai ang dênin.

⁷RENGPAA khan irngamin lân, ama chu nghâk zâm zâm roh; Ni om lama vânneina dongtu sikin beiindong no roh. Ngaituana sualhai puiinhlingtu sika khan.

⁸Ninginthik hi masanin lân, ningmur hi ma roh. Beiindong no’n lân thil suala a hong tungna ngai a ni.

⁹Thil saloi thotuhai chu irhmangtirin an iom hrang a ni: RENGPA nghâktuhai chu ram hi lua an ti.

¹⁰Sôtnotea mi sia chu om ta no nia: A ni, a omna hmun chu en en khomin lân, om ta no ni.

¹¹Thuhnuairôlhaiin chu ram hi lua an ta: Irngeina hmangin irhniang an ti.

¹²Mi sia khan mi fel doi a ta, A’rkam nôikhum a ti.

¹³RENGPA khan ama kha innuisan a ti: A nikhua a hong itung hrang ti an hriat sikin.

¹⁴Inriang le invâihai intûktir hrang le om dân dikhai thatpai hrangin. Mi sia khan khandai an phôia, an thal ngul insim an ti.

¹⁵An khandai khan anni milung kha sun a ti, An thal ngulhai kha inkhiakpaiin om sa a ti.

¹⁶Mi fel thil tômte nei chu mi sia tamtak thil nei zel zulhai nêkin chu a sa ual a ni.

¹⁷Mi sia bânhai chu khiakpaiin a iom hrang a ni: Mi fel chu RENGPA’N a chel chian ngai.

¹⁸RENGPA’N mi sa famirkip nikhuahai an hriata: An irchon lua hrang chu kumkhuaa om mai hrang a ni.

¹⁹Zoro saloia mualinphoi no nihaia: Châm kumhaia khom khop an ti.

²⁰Mi siahai chu irhmang an ta, RENGPA doituhai khom hloisûl pâr chuai ang ni an ti.

²¹Mi sia’n chu pûk ata pe nôk ta ngai maka: Mi fel chu mi lung an khama a pêk lem ngai.

²²A satvurna dongtuhai chu ram hi an ilua hrang a ni, Khua sâlna dongtuhai chu irhmangtirin an iom hrang a ni.

²³RENGPA’N an fena hranga a hruai ngai a ni, A nuamlam thotuhai chu a enkol ngai.

²⁴Tûk khomhai sianlân, tûk thengthai no nihai: RENGPA’N a kutin a chel mai sikin.

²⁵Nâipang ki lei ni tâka, atûn chu ki hong tar tâka, Khannisianlân, mi fel chu rotsana a iom hmu ngai ma unga, A’rchihai kutdoa om khom la hmu ngai ma ung.

²⁶Sûn ni tâkin lung mi a thunga, an pûktir ngaia; A’rchihai khom an vân a sa ngai.

²⁷Sual rotsanin lân, thil sa tho roh; Khanchu kumkhua’n om mai ni ti.

²⁸RENGPA’N chu roirêlna fel a’rngaiinhlua, A mi irthianghai chu rotsan ngai mah; Kumkhua hrangin vong insa’n an oma: Mi sia irchihai chu irhmangtirin om an ti.

²⁹Mi felhaiin chu ram hi lua an ta, A sûnga hin kumkhua’n om an ti.

³⁰Mi fel bâiin chu vârna thu an sîr ngaia, A milei khan roirêl felna thu an sîr sa ngai.

³¹A Pathian dân chu a milunga a oma; Pêtsan ngai mah.

³²Mi sia kha mi fel kha a enirchika, Thatpai a tum ngai.

³³RENGPA’N ama kha a kuta rotsan no nia, A roi an rêl tika chu thiamno inchangtir phal viat no ni.

³⁴RENGPA chu nghâkin lân, a lampui chu hro roh, Khanchu ram hi lua hrangin nang chôiindôm a ti: Mi siahai irhmangtira an om lai kha la hmu ni ti.

³⁵Mi sia chu a satêna ircham neia, A mongna hmuna thing incher mur anga a om lai ki hmua.

³⁶Khannisianlân ki va fe nôkin chu, irngai ta, ama chu lei om ta maka, a ni, ki zonga, khannisianlân, hmuthei ni ta mah.

³⁷Mi sêlnaboi irsinsia’n lân, mi dik tak chu en roh, Khaang mi mongna hrang kha chu irtharngamna a ini hrang a ni.

³⁸Tho’nchâituhai chu a pâla insiatin om an ta, Mi sia mongna chu irhmangna ni a ti.

³⁹Aniachu mi felhai saninhringna chu RENGPA kuang ata a nia: Ama chu lunginzîng laia an kulpui a ni ngai.

⁴⁰RENGPA’N anni kha a changpuiin a saninzôk ngaia, Ama kuanga an iamna an irnghat sikin, Mi siahai ata kha a saninzôkin a saninhring ngai.