Read Hrangkhol INPÂKNA HLAHAI 38 Bible Online

INPÂKNA HLAHAI 38 - Hrangkhol bible

INPÂKNA HLAHAI 38

¹O RENGPA, ninginthikin ni halirchu no’n lân: Ninginmurin ni sep sa no roh.

²Ni thalhai chu ki panga ar zep nguta; Ni kuttum chu ki chunga a chum ta.

³Ni milung hoi loina sikin ki taksaa hin dam tik rêng om maka; Ki sualna sikin ki ruhai hi hrisêl tik rêng om sa ngai mah.

⁴Ki pualoinahai khan ki lu hi a ngîm paia, Puakrik tak, ki izoiloi hrang ang hi a ni.

⁵Kin vêtna sikin Ki sabêhai hi a thu’n a hmon zoi ta.

⁶Ki naa, ki kûn chian chiana; Sûn sôtin chardongin ki’rvêl ngai.

⁷Ki kong hi a lum rak rak maia; Ki taksaa khom hin dam tik rêng om mah.

⁸Ki’rzala, a ni zeng zuaka; Ki milung hoiloina sikin kin hrûm rak raka,

⁹RENGPA, ki nuamlam murdi hi ni makunga a om zita; Ki inrûm khom hi nangmaa thuppai ni mah.

¹⁰Ki milung hi dop dop a tia, irthahrui nei ta ma unga: Ki mit vârna lakin a ni rotsan tâka.

¹¹Lung ni thungtuhai le ki rualhai chu ki thil irveia hin an nir kêmsana; Ki sûngsuakhai khom hlataka an ngîr ngai.

¹²Ki hringna inboi tuma zongtuhaiin chu nin ôktirna hrangin châng an kam ngaia; Ki siatna hrang zongtuhai khom khan thu saloi takhai an insîr ngaia, Sûn sôtin huangna thuhai an ngaitua ngai.

¹³Khannisianlân kei chu mi kuarsêt angin inhre loiin ki oma; Chongtheiloi mi bâi âng ngai loi angin ki om.

¹⁴A ni, mi chong inhre theiloi, A bâia halirchûna reng suak ngailoi angin ki om.

¹⁵O RENGPA, nang ki sabeia: O RENGPA ki Pathian, nangin ni sâm ni ti.

¹⁶“khano’nchu nin riam a ta, Ki kesir a châi le ki chunga lian irti an ti,” ki iti a ni.

¹⁷Ki’rtet vâng vânga, Ki beidongna khom ki makunga a iom mai a ni.

¹⁸Ki pualoina chu inpuang ki ta; Ki sualna sika beidongin ki iom hrang a ni.

¹⁹Khannisianlân a ni doituhai chu an zâi a sa’n, an hrâta: Dikloi taka ni khôkmâktuhai chu an pung mur tâka.

²⁰Thil sa thil suala thuan ngaihai hi thil sa ki’rzûl sikin ni doituhai an nia.

²¹O RENGPA, ni rotsan viatno roh: O ki Pathian, nir hlapui no roh.

²²O RENGPA ni saninhringtu, Ni changpui hrangin irhnot roh.