Read Hrangkhol INPÂKNA HLAHAI 39 Bible Online

INPÂKNA HLAHAI 39 - Hrangkhol bible

INPÂKNA HLAHAI 39

¹“Ki milei hin thil ki tho’nsual loina hrangin ki om lamhai hi enkol insa ki ta: Mi siahai ki makunga an om sûngin ki bâi hi hmûr khitna’n khit ki ti,” ki tia.

²Khanchu dâihrekin chong loiin ki oma, A sa lam tiang khom ki dâihreka; Khannisianlân ki beiindongna chu kaithoiin a om ual ngaia,

³Ki phîng sûnga hin ki milung a lum rak raka; Ki ngaitua ki ngaitua’n chu mei chu a hong chok suaka; Khanchu, ki milei hin thu an sîr tâka:

⁴“RENGPA ki mongna hrang le, ki idam hrang ten chu. Itin mo a ini nin hretirin lân; Ki iderindêpzia hi nin hretir roh.

⁵Irngai ta, ki dam sûng hi kutzaphate tiat angin ni siama; Ki kum hi ni mithmua chu ite khom ni maka; Mi tin hin an sat lai tak khomin an pumpuiin ite ni loi ang an ni.

⁶Mi tin hi raifân ang takin an lêng tâka: Mâkanaa buai an ni ngai: Irchon an bukkhôm ngaia, a’rhmutir hrang om mahai.

⁷Khan, RENGPA, atûn hin imo ki inghâk? Nangma kêng, ki sabeinaa a iom a ni.

⁸Ki tho’nchâina murdia ni sansuakin lân: Mi invêt hrilsiatin nin omtir no roh.

⁹Nangma itho a ni sikin, Chong ma unga, ki bâi khom âng ma ung.

¹⁰Ni ni izêmna hi ki kuang ata ni lâkpai pe’n lân: Ni kut thâknaa inboipai ki ni hi.

¹¹Mi a tho’nsualna sika halirchu’n ni isep hin, A satna hi irthî angin nin siat ngaia; Mi tin hi ite ni loi ang an ni.

¹²O RENGPA, ki chongchaina hi irngaiin lân, nang kin samna hin mikuar do’n lân; Ki mitrithi tâk hi dâisanhrek no roh. Ni mikhual ki nia, ki’rchibulhai ang khan khual inzin chian ki ni.

¹³O, hi hin ki suaka, ki om pat mân hin, Ki hong har nôkna hrangin ni hôi roh.