Read Hrangkhol INPÂKNA HLAHAI 40 Bible Online

INPÂKNA HLAHAI 40 - Hrangkhol bible

INPÂKNA HLAHAI 40

¹RENGPA chu ki nghâk zâm zâma; Khanchu a mikuar a zuang sunga, ki ikoi kha ar ngai ta.

²Irhmangna khurpadop ata, dialdôk irkân tâk ata kha a ni kaisuak tâka; Khan, ki ke chu lungpui chunga a’rnghata, ki ke pêthai chu an dettira.

³Hla thar ki bâia a sia tâka, ei Pathian inpâkna chu: Mi tamtakin khahai kha hmu an ta, chi an ta, RENGPA chu iam ta an ti.

⁴RENGPA chu irnghatna an neia, Lârirpâkhai le milakna tianga pêthai ngaisak loi mi chu, a vân a sa e.

⁵O RENGPA ki Pathian, nangin sinirkhêl ni ithohai leh, keini tiang ni ngaituanahai hi a tam tak taka, Khahai kha ni makunga inlangtir zoi zât ni maka; Inhriattirin hril hrang ni inlân, Tep zoi zât ni no ni.

⁶Irbôlna le thilinhlan chunga hin lômna zel nei mak chea; Ki mikuarhai hi ni nin vârtir pe tâka: Hâlirvôm thilinhlan le sual hranga thilinhlan chu inphût mak chea.

⁷Kha zoi le chu, keima’n, “Irngai ta ki honga; Lekhabu irzuata khan ki thu a irziak a ni:

⁸O ki Pathian, ni nuamlam tho hi ki nuamlam tak a ni; A ni, ni dân thu chu ki milunga a om maia,” ki tia.

⁹Inkhômna roiinpui tak kha felna thurchi sa ki tâng insampuia; O RENGPA, irngai ta, Ki bâi hi inhnar no ning ti nin hriat.

¹⁰Ni felna chu ki milung sûnga thup ma unga; Ni iamomna le ni takna chu inkhômna roiinpui taka mihai ata chu thup ma ung.

¹¹O RENGPA, ni inrenhai chu ki kuang ata inhnar no’n lân: Ni lungkhamna le ni takna khan ni sûnghual mai ri se.

¹²Thil saloi tep zoi loi khan a ni hual vêla, ki tho’nchâinahai khan a ni’rzûl phâka, Khanchu hmu thei ta ma unga; kha kha ki samzâihai nêk khomin a tam uala, ki milung hi a’rzal ta.

¹³O RENGPA, lungkham takin ni saninzôkin lân: O RENGPA ni changpui hrangin irhnot roh.

¹⁴Ki hringna inboi tuma zongtuhai chu mualphoi tak le inzak takin omhai sianlân; Ki siatna chunga lômhai chu irhei kîrtirin inzakin om ri sehai.

¹⁵“O hoi! O hoi!” ni tituhai chu an mualinphoi sikin lunginzîng takin om ri sehai.

¹⁶Nang a zongtu murdihai chu nangmaa khan raifân tak le lôm takin omhai sianlân: Ni saninhringna irngaiinnattuhai khan, “RENGPA chu chôiindômin om ri sehai,” ti mai ri se.

¹⁷Kei chu inriang le invâi tak ki nia, Khannisianlân RENGPA’N a ni ngaitua ngaia: Nang chu ni changpuitu le ni saninzôktu ni nia; O ki Pathian, ir-ial viat no roh.