Read Hrangkhol INPÂKNA HLAHAI 44 Bible Online

INPÂKNA HLAHAI 44 - Hrangkhol bible

INPÂKNA HLAHAI 44

¹O Pathian tianlai an damlaia ni sinthohai kha kin irchibulhaiin an ni hrila, kin mikuarin kin inhriat.

²Nangin ni kut ngeiin nam tin chu nin hnot suaka, anni kha ni phunhai tâka; Mi tin chu deng nin theitira, Nangma mihai chu vânsa’n ni siama.

³Ram hi lua hranga anni khandaia an ilâk ni maka, Anni bâna irsaninhring ni ual mahai: An chunga ni lôm sikin, Ni kut chang tiang le ni bân le, ni hmêl vârin a ni uala.

⁴O Pathian, nang chu ki Reng ni ni: Jakoba saninzôkna hrangin thu pe ro.

⁵Nangma sikin a ni doituhai chu irtettir kin ta; Ni’rhming sikin a ni beituhai chu chîl chit kin ti.

⁶Ki thal ngul hi tûng no ninga, Ki khandai hin ni saninhring ual no ni.

⁷A ni doituhai ata chu nangin ni ni saninhring ual tâka, A ni khôkmâktuhai chu mualphoi ni saka,

⁸Sûn ni tungin Pathian kha kin songa, Ni’rhming chu kumkhua’n inpâk sa kin ti.

⁹Atûn chu nangin ni ni theimâka, ni nin zaktira; Kin sipaihai kuang lak suak sa ta mak chea.

¹⁰A ni doituhai ata kha ni nin rottir ngaia. A ni khôkmâktuhaiin chu sum kha an inuam nuam an lâk ngai.

¹¹Belra that hrang angin ni ni siaa, Nam tin laia ni nin darhtir tâka.

¹²Ni mihai hi mâkana’n ni zuara, An man chu irchongpui ual mak che.

¹³Nangin kin kôla mihai insîrinsiatin ni nin omtira, Kin kôl vêla mihai hmusit le enkhûmin ni nin omtir saa.

¹⁴Nangin nam tin laia a siat tiang ni nin omtira. Ni hmumâkin an luhai ni nokkhumin ni nin omtir saa.

¹⁵Kin zakna hi sûn sôtin ki hmâia a om ngaia, Ki imualinphoina hin a nir khu zoi ta.

¹⁶Ni doituhai le ni hnôltuhai hmusit êsêlna chong inhriata irthokin.

¹⁷Hihai murdi hi kin chunga a tunga, Khannisianlân nang irnghil ngai ma ung. Ni thuthunga hin tho pa pai ngai ma ung.

¹⁸Kin milung hi irhei kîr maka, kin ke pêthai hin ni lampui chu pêtsan ngai mah.

¹⁹Nangin sihalhai omnaa ni ni soisak chita, Thina daihlîma nir khûna hrangin.

²⁰Kin Pathian irhming kin irnghil mani, Ram dang pathian tiang kin kuthai kin phara a ni’n chu,

²¹Pathianin chu a izong suak loi hrang ma ni? Lungrîla thuphai hi an irhriat mai a ni.

²²A ni, nangma sikin sûn sôtin ithatin ki om ngai; Belra that hranghai anga irbe kin ni.

²³O RENGPA, har ro ba, ithoa mo ni inmusu? Mengin lân, kumkhua’n ni theimâk no ro.

²⁴Ithoa mo ni hmâi ni ithup, kin intakzia le hnuaisiatzia kin ituangzia hi ni irnghil ngai hi?

²⁵Kin hringna hi vâiphin sikin a kûna; kin phîng laka irnênga a kop khaka.

²⁶Ni changpui hrangin thoiin lân, Ni lungkhamna sikin nir tan ro.