Read Hrangkhol INPÂKNA HLAHAI 45 Bible Online

INPÂKNA HLAHAI 45 - Hrangkhol bible

INPÂKNA HLAHAI 45

¹Ki milung hi thil sa’n a lêt don dona; Inlaltak chungchâng thua ki thil phua chu ki insîr hrang a ni: Ki milei hi lekha irziak thei tak pen a ni.

²Mihriam nâihai nêkin ni hmêl hi a sa uala; Lungkhamna hi ni hmûra buak a ni. Khasikin Pathianin kumkhua hrangin sat nang a ivur a ni.

³O, mi hrât, ni khandai kha ni konga vong ro, Ni roiinpuina le ni satnahaiin.

⁴Thutak le thuhnuairôlna le felna sikin ni satna irbelin lungthi takin sakor chunga chuangin fe mai ro! Khanchu ni kut chang tiangin thil irkhêl takhai nang a irchutir hrang a ni.

⁵Ni thal chu a’rzuma: Inlaltak doituhai milunga khan an inver inngaia. Mi tin chu ni hnuaia an tûk ngai.

⁶O Pathian ni rêngtoihmun chu kumtuangin a iom hrang a ni: Theibîk nei loina rêng khianghrol chu ni ram rêng khianghrol chu a ni.

⁷Felna chu nir ngai inhlua, pualoina chu ni khôkmâk kha; Khasikin, Pathian, ni Pathian chu ni rualhai nêka irkhêl raifânna sahriak nang a’rthûtir tâka.

⁸Ni silkai murdi chu mura mirimhai, aloe mirim hai thingzungthum mirimhai an nam veng vunga; Saihâhaia siam rêng inhaia perkhuang chi dang dang irhâi hong suakhai khan nang a inlômtir a ni hi.

⁹Ni nupang sahai laia khan rêng nâinuhai an kop saa; Ni chang tiang chu Ofir rângachaka irvo’n rêngnu chu a ngîra.

¹⁰O, ki nâinu, irngaiin lân, irngaitua’n lân, ni mikuar sung ro; Ni mihai le ni pa ina mihai chu irnghil ro;

¹¹Khanchu inlaltakin ni hmêl satak hi a inuam hrang a nia; Ama chu ni RENGPA a nia; Khanchu ama chu chubai mûk ngai roh.

¹²Tura nâinu chu thilpêk chôiin kha khan om a ta; Mi laia irchonghai ngei khan ni lungkhamna ngên an ti.

¹³Reng in sûnga Reng nâinu chu a roiinpui oka; A silkai chu rângachak ziaa siam a ni.

¹⁴Puan insui sa silin inlaltak kuang hruai an ta; Ama zuitu, a rual dôngmatehai chu, Ni kuang hruai an ti.

¹⁵Lôm tak le raifân takin hruai an ti: Inlaltak ina khan lût an ti.

¹⁶Ni pahai irthûla ni nâihai om an ta, Anni chu irnêng chung murdia hin inhre mai hrangin siam ki ti:

¹⁷Khasikin mi tinin kumkhontuangin lômthu nang hril an ti.