Read Hrangkhol INPÂKNA HLAHAI 46 Bible Online

INPÂKNA HLAHAI 46 - Hrangkhol bible

INPÂKNA HLAHAI 46

¹Pathian chu ei zôkna le ei hrâtna, lunginzîng laia changpui lattu nâitak a ni.

²Khasikin irnêng hi hong danglamin, Tânghai hi tuikhanglian sûnga irson pat sian khom, chi no ning;

³A tuihai kha irse mur murin phûl but but khom sianlân, A’rsôn ta hrai sikin tânghai hi inhnîng dur dur khom sianlân, chi ual hliak no ning.

⁴Ivadung inkhat a oma, kha ônhai khan Pathian khopui an lômtir ngai, Anchungtaka omna hmun irthiang chu.

⁵Pathian chu a laitaka a oma; inhnîng no ni: Pathianin khovâr tena chu changpui a ti.

⁶Nam tin an irse mur mura, ramhai chu an hnînga: Ama chu ar hâi a suaka, irnêng hi a hong zôi tâka,

⁷Sipaihai RENGPA chu ei kuang a oma; Jakoba Pathian chu ei kulpui irsâng a ni.

⁸Thoi, RENGPA sinthohai hi en roi, Irnênga thilirkhêl tak tak a itho hi.

⁹Ama’n chu irdoinahai kôlkung dênin an boitir ngaia; Thal ngul chu a khiaka, ufei chu a sât inbong ngaia; Tâlihai chu meia a rô irhmang ngai.

¹⁰Dâihrek unglân, Pathian ki nih ti hi inhre roi: Nam tin laia chôiindômin om ki ta, irnênga hin chôiindômin om ki ti.

¹¹Sipaihai RENGPA chu ei kuang a oma; Jakoba Pathian chu ei kulpui irsâng a ni.