Read Hrangkhol INPÂKNA HLAHAI 49 Bible Online

INPÂKNA HLAHAI 49 - Hrangkhol bible

INPÂKNA HLAHAI 49

¹Mi tinrênghaio, hi hi irngaitua unglân; Rammuala om murdihaio, mikuar lei sung roi.

²Mi chîn le mi lian, Mi irchong le mi inrianghai khomin.

³Ki bâi hin vârna thu insîr a ta; Ki milung ngaitua chu inhriat thiamna thu ni a ti.

⁴Chongirkhek thua ki mikuar sung ki ta: Ki thu’nthûk insîr chu perkhuangin hrilfia ki ti.

⁵Nikho saloihai, ki ke ârtui kôla pualoina chu ni hual vêl khomsian, Ithoa mo ki ichi hrang?

⁶Mâni sum tûnga, mâni irchongna a satêna songtuhai chu;

⁷Tukhomin an urêng khom irtan thei viat no nihaia, Pathian kuang irtanna pêk pe thei ual hliak no nihai:

⁸An hringna irtanna chu hlu tak a nia, Itiklai khomin pêk inchuk thei no ni.

⁹A hring maia, mongna a hmu loina hrangin chu.

¹⁰Mi vârhai khom an thia, Mi’nvêt le mi môlhai khom an irhmang seng senga, An sum mi danghai an mâk pe ngaihai kha an inhriata.

¹¹An lungrîl ngaitua lam chu, An inhai kha kumkhuaa om hrang ang le, An omnahai chu irlo murdi dêna om hrang angin a ni; An ramhai chu anni irhming zit an irputtir ngai.

¹²Khannisianlân mihriam hi chôiindômin om mai mahaia: Ramsa irhmang ngaihai ang dên hi an ni.

¹³Kha an om lam kha chu invêtna a ni: Khannisianlân, an hnunga chu mihaiin an thu insîrhai chu a sa an ti ngai.

¹⁴That hrang belra Seol-ah khitthunghai ang an ni, Thina chu a enkoltu ni a ta: Khua a vârin mi felhaiin an chunga roirêl an ta; an taksa hek a ta, Seol chu omna in hrang ni a ti.

¹⁵Ki hringna rêk chu Pathianin Seol kut ata irtansuak a ti; Ama’n chu a ni ilôm hrang a ni.

¹⁶Ni’rchongtira a hong oma, A sûngkua roiinpuina chu a hong irkhêl sit sit khomin, chi no ro:

¹⁷A thi tika chu ite chôi thei no ni; A roiinpuina khan a izui hrang ni sa mah.

¹⁸A hring laiin a hoiin irbe khom sianlân, (Hlo a chuk sikin mi’n inpâkhai sian khom),

¹⁹A’rchibulhai murdi kuang thinaa khan zom a ta, Itiklai khom vâr hmu ngai loi rênghai kuang khan.

²⁰Mihriam chôiindôma oma, inhriat thiamna nei ual loi chu, Ramsa irhmang ngaihai ang dên hi an ni.