Read Hrangkhol INPÂKNA HLAHAI 50 Bible Online

INPÂKNA HLAHAI 50 - Hrangkhol bible

INPÂKNA HLAHAI 50

¹Pathian, itinrêngthothei, RENGPA khan thu an sîra; Irnêng hi misa suakna ata a tâkna dênin a koia.

²Satirkipna, Zion ata chu, Pathian chu a vâr suak tâka,

³Ei Pathian chu zuang a ta, dâihrek no ni: A maton tiang chu mei chok zur zur a ta, A kôl vêla khan a sate’n phâivopui tho a ti.

⁴A mihai roi a rêl theina hrangin Chung tiang irvânhai le irnêng hi inhriatpuitu hrangin koi a ti.

⁵“Ki mi irthianghai ki kuang hong hruai bukhai roi, Sa thata ki kuang thu thunghai chu,” tiin.

⁶Khanchu, irvânhai khin a felna chu tâng insampui a ta, Ama Pathian ngei chu roirêltu a nia.

⁷“O ki mihaio, irngai roi, thu ki insîr hrang a ni; O Israel, irngai roh, nang inhriatfiatir ki ti: Kei hi Pathian, ni Pathian ngei kha ki ni hi.

⁸Ni irbôlnahai sikin nang halirchu no ning; Ni hâlirvôm thil irhlanhai chu ki makunga a om chiana.

⁹Ni in ata chu sehrât chalpa rêng rêng la suak no ninga, Ni sa hual vêlhai ata kêlchalhai khom la suak hliak no ning.

¹⁰Rammuala ramsa tinrênghai hi ki ta a nia, Mual sâng tamtak chunga ramsa omhai khom kha.

¹¹Chunga vuang murdi khom ki ta an nia, Rama thilhring khom ki ta an ni.

¹²Ki phîngchâm khom sian nang hril no ning: Irnêng le a chunga thil om murdihai hi ki ta a ni.

¹³Sehrâtchal hmê ki fâkin kêl thisen ki i-in hrang ma ni?

¹⁴Pathian kuang lômthu insîr irbôlna kha inhlanin lân; Ni thu’nkung khom Anchungtaka kuang intung roh.

¹⁵Khan, lungzîng nia chu ni koiin lân; Nang saninzôk ki ti, khanchu nangin ni ni ichôiindôm hrang a ni,” a tia.

¹⁶Mi siat kuang khan, Pathianin “Itho sika mo ki thu’nkung hi inhriattira, ki thuthung hi ithoa mo ni bâia ni sâm mai?

¹⁷Sepna hi ni khôkmâka, Ki thuhai hi hnung tiang ni pai maia.

¹⁸Inru ni hmu’n a sa ni tipuia, Uirepahai lak nir hloppui sa ngaia.

¹⁹Ni bâi hi sual ni pêka, ni milei hin huangna a siam sa ngai.

²⁰Toi pumin ni urêng ni hrilinsiata; Ni urênghai ngei kha ni nuiso ngai.

²¹Khaang thil kha ni thoa, Khannisianlân ki dâihreka; Khanchu nangma ang chianin ni ni bê ngai: khannisianlân nang halirchu ki ta, ni mithmua a dônte’n inlangtir ki ti.

²²Nangni Pathian irnghilhaio, hi hi irngaitua roi! khano’nchu nangni inpot chitna ki ti, nangni saninzôktu zel om no nihai.

²³Tukhom lômthu insîr irbôlna inhlan murdi chu an ni chôiindôm ngai a nia; Khan, a omlam vong insatu kuang khan Pathian saninhringna nang inentir ki ti,” a tia.