Read Hrangkhol INPÂKNA HLAHAI 55 Bible Online

INPÂKNA HLAHAI 55 - Hrangkhol bible

INPÂKNA HLAHAI 55

¹O Pathian, ki chongchainaa hin ni bêng zuang do’n lân; Lungkham ki ngênnaa hin irthup no roh.

²Irngaiin lân, ni sâm roh: Ki lunginzîngna sikin ki’rvêl ruaia, kin hrûm ngai;

³Ni doituhai irhai sikin, mi pualoihai nêpsiana sikin: Anni khan buaina ki chunga an intunga; Ningmurin deng an nin theitira.

⁴Ki sûnga hin ki lungrîl a na tak taka, Thina irkhêlnahai khan a ni dela.

⁵Chitna le irlo inthingna’n a ni dea, Irtha tâkna’n a nir khu zoi ta.

⁶Khanchu, “Vasu angin mitha nei inlân chu o! Khanchu vuang pat ki ta, irtharngam takin om ta ki ti.

⁷Irngai ta, hlataka lêng ki ta, Ramchâra om ki ti.

⁸Khorthi le phâivopui hi, Irbîkna hmuna rotsan lat ki ta,” ki tia.

⁹O RENGPA, an milei chu insiatin intertir ro: Khopuia chu irnêpsiana le irhmumâkna ki hmua.

¹⁰A sûn a zânin khopui chu an vêl an vêla: A sûnga chu sualna le intakna a om sa.

¹¹Siatna a sûnga a oma: Huangna le milakna khan a kholâi kha suaksan ngai mah.

¹²Ni hrilsiattu chu râl ni maka; Ni sianlân chu, tuang thei ual ki ta: Ki chunga omliantu chu a ni khôkmâktu ni ual mah; Ni sianlân chu, ki irbîksan hrang pial te:

¹³Khannisianlân nang, ki mi ir-angpui, Ki rual, ki rual irnaipui ni nia.

¹⁴Bâi thum takin ei irbiak ngaia, Mipui laia Pathian biak ina ei lêng ngai kha.

¹⁵Thina an chunga zuang tung thut sianlân, Khurpadopa khan a hring pumin chum ri se: Siatnahai kha an omnaa le an sûnghaia a oma.

¹⁶Keima’n chu Pathian koi ki ta; Khanchu RENGPA’N ni saninhring a ti.

¹⁷Khohloi hai, zînga hai, sûna hai, ki lunginzîngna thu kin sîrin inrûm ki ta: Khanchu, ama’n ki’rhâi irngai a ti.

¹⁸Ki chunga a ni beina irthokin, Ki hringna hi irtharngam takin a saninzôk tâka: A ni beituhai an tam sikin.

¹⁹Pathian, tianlai ata om mai khan, Irngaitua a ta, sâmhai a ti, Danglamna nei ngai loi, Pathian chi ngai loihai chu.

²⁰Ama le irngeihai chunga khan a kut an leka: A thuthung chu an siat tâka.

²¹A bâi chu sahriak angin a tora, A milung chu irdoina a nia: A thuhai chu sahriak nêkin ar nâla, Khannisianlân khandai phôisaihai a ni.

²²Ni puakrik chu RENGPA chunga irnghatin lân, Khanchu ama’n nang inhrât a ti; Mi fel chu itiklai khom inhnîngtir phal no ni.

²³Khannisianlân, O Pathian, nangin anni chu irhmangna khurpadopa khan inchumtir ni ti: Thisen insua ngai mihai chu an hring sûng chimrip khom hring zoi no nihai. Keima’n chu nang iam ki ti.