Read Hrangkhol INPÂKNA HLAHAI 56 Bible Online

INPÂKNA HLAHAI 56 - Hrangkhol bible

INPÂKNA HLAHAI 56

¹O Pathian, lung nin kham ro; mihriamin nin lem zoi an tuma: Sûn sôtin ni beiin an ni nêpsia ngai.

²Ki ikhôkmâkhaiin sûn sôtin nin lem zoi an tuma: Lârirpâk taka ni beituhai hi an tama:

³Ki chi rikipin, nangma nang iam ki ti.

⁴Pathian ki iama, a thu inpâk ki ta: Pathian ki iama, chi no ning; Taksa’n imo a ni iti thei hrang?

⁵Sûn sôtin ki thuhai chu an lâk kôi ngaia; An ngaituana murdi chu ki satloina tiang inzen a ni.

⁶An inkhôma, an irbîka, ki hnunghai an irsinsia ngaia, Ki hringna inboi tuma an inghak ngai ang hin.

⁷An sual hremna an ilôi thei hrang ma ni? O Pathian, ninginmurin mi tin chu irhniamtir roh.

⁸Nangin chu kin vâinahai hi ni’rsinsia ngaia: Ki mitrithihai hi ni savun koka khan thun ro; Ni lekhabua a ichuang intam mo ni ma?

⁹Nang ki koi zoro ngeia khan a ni doituhai chu rot an ti: Hi hi kin hriat Pathian ni thop hi.

¹⁰Pathiana khan a thu inpâk ki ta: RENGPAA khan a thu inpâk ki ti.

¹¹Pathian ki iama, chi no ning; Mihriamin imo an ni iti thei hrang?

¹²O Pathian, ni kuang chong inkunghai ki neia: Lôm thu’nsîr irbôlnahaiin nang thuan ki ti.

¹³Ki hringna hi thina ata ni saninzôk tâka: Ki kehai hi tûk loi hrangin ni isaninzôk tâk mo ni ma? Mihring vâra hin Pathian makunga ki lêng theina hrangin.