Read Hrangkhol INPÂKNA HLAHAI 58 Bible Online

INPÂKNA HLAHAI 58 - Hrangkhol bible

INPÂKNA HLAHAI 58

¹O, roirêltuhai, felna thu mo nin hril tak tak? O mihriam nâihaio, dik takin mo roi nin rêl?

²A ni, nin milungin chu thil sual tak nin tho ngaia; Irnênga nin kuta thil saloi taka tho kha nin var ngaia.

³Mi pualoihai chu an nu sûng rengata Pathian ata senin an oma: An suak zoi le milak thu insîrin an rot ngai.

⁴An tûr chu mirûl tûr ang a nia: Rûlriha kuarsêt, a mikuar hîp ngai ang chu an ni;

⁵Kha khan mirûl dôi sak theihai irhâi chu irngai ngai mah, I anga thei khomin indôi khom sianlân,

⁶O Pathian, an bâia khan an hâhai chu inthing pe’n lân: O RENGPA, kâmkeibaknei vânglaihai ha lian tak takhai chu kher suak ro.

⁷Anni chu tui hrât taka luang angin luangpaihai sianlân: Hloisûl angin sirsôpin chuai ri se.

⁸Ârterko, tuia a iboi ngai ang hi ni sianlân: A zoro loia nupang nâi nei, misa hmêl rêng rêng hmu loi ang hi ni ri se.

⁹An inhriat mân ngeiin, anni chu ilhling kung angin sâtin om an ta; An hring lai ngeiin Pathianin a ningmurna irkhêl takin, sêm irhmang a ti.

¹⁰Mi felin chu phuba lâkna a hmu’n lôm a ta: Mi pualoi thisena khan a ke chu irsûk a ti.

¹¹Khanchu mihaiin, “Mi fel hrangin chu lômman a lei om tak taka: Irnênga hin roirêltu Pathian a lei om tak tak a ni hi,” ti an ti.