Read Hrangkhol INPÂKNA HLAHAI 59 Bible Online

INPÂKNA HLAHAI 59 - Hrangkhol bible

INPÂKNA HLAHAI 59

¹O ki Pathian, a ni doituhai ata ni saninzôkin lân: A ni beituhai ata hmun irsânga ni bâng ro.

²Thil tho’nsualtuhai ata ni saninzôkin lân, Thisen insuak songhai ata ni saninhring roh.

³O RENGPA, ki porinchena sik ni loiin, Ki sual sika ni ual loiin, Irngai ta, ki hringna hi an inruang maia, Mi hrâthai chu ni bei hrangin an ipung khôm a ni.

⁴Ki sual no khomin an intâna, an irsinsiama: Ni changpui hrangin irkai inharin lân, en roh.

⁵O RENGPA, sipaihai Pathian, Israelhai Pathian, Nangma ngei chu nam tinrêng hro hrangin thoiin lân: Mi vârirlet sual takhai rêng rêng chu lunginkham no roh.

⁶Khohloi tiang an hong nôka, ui angin an inrung mura, Khopui chu an vêl an vêla.

⁷Irngai ta an bâiin an inmûk suaka; An hmûra khan khandaihai a oma: “Tu mo inhriat om?” an ti maia.

⁸Khannisianlân O RENGPA, nangin anni chu innuisan ual ni ta; Nam tinrêng chu innuisan a ti.

⁹O a nin hrâttu, nang nghâk mai ki ti, Pathian chu ki kulpui irsâng ni ni.

¹⁰Ki chunga lungkhamna Pathian khan ni nghâk a ta: Pathianin ki râlhai chunga ki thu nuamlam chu nin hmutir a ti.

¹¹Anni chu thatpai no ro, khano’nchu ki mihaiin nang irnghilna an ti: O RENGPA, kin pho tak, Ni sinthotheina’n indartirin lân, irhniamtir roh.

¹²An bâi sualna sik le an hmûra thu suak sikin an lârirpâkna ngeia khan in-ôk ri sehai. An thu’nsîr ngai lak khua sâlna le milak thu sik khomin.

¹³Annihai chu ninginmurin inboipaiin lân, an om ta loina hrangin inboipaiin lân: Pathian Jakoba-hai kuang roi a rêl ti inhre ri sehai, Kôlkung dênin.

¹⁴Khan, khohloi tiang hong nôk sianlân, Ui angin inrung sianlân, Khopui chu vêl vêl ri sehai.

¹⁵Anni chu fâk hrang zongin irvâk irvâk an ta, An khop no’n chu zân khosôtin om an ti.

¹⁶Khannisianlân kei chu ni hrâtna thu hi hlaa sak ki ti; A ni, zînga chu ni lungkhamna thu raifân takin hla’n sak ki ti: Nang chu ki kulpui irsâng, Ki lunginzîng nia ki saninzôkna ni ni ngai sikin.

¹⁷O a nin hrâttu, nangma inpâkin zâi ki ti: Pathian chu ki kulpui irsâng, ki chunga lungkhamna Pathian kha ni ni.