Read Hrangkhol INPÂKNA HLAHAI 62 Bible Online

INPÂKNA HLAHAI 62 - Hrangkhol bible

INPÂKNA HLAHAI 62

¹Ki hringna hin Pathian vai a nghâka, Ama ata ki saninhringna a hong isuak hrang a ni.

²Ama vai kha ki lungpui le a ni saninhringtu a ni: Ki kulpui irsâng a nia; a saterengin chu inhnîng no ning.

³Nangnihai murdi’n, thatpai hrangin, Lung bang rô inbei ang le, irpal inrîl vâng vâng bei angin, I dôr ten mo mi inkhat hi nin ibei hrang?

⁴A roiinpuina ata namtha hrang ringotin an irtia; Milak tho hi an nuamlam tak a ni. An bâiin sat an vura, khannisianlân an lungrîlin khua an sâl ngai.

⁵Ki hringna, Pathian vai nghâk ro; Ki sabeina hi ama kuang ata suak a ni.

⁶Ama vai kha ki kulpui le ki saninhringna a ni: Ki kulpui irsâng a nia; inhnîng no ning.

⁷Pathian kuang ki saninhringna le ki roiinpuina a oma: Ki hrâtna lungpui le ki zôkna chu Pathiana a om.

⁸Nangni mipuihaio, itiklai khomin ama kha iam unglân; Nin milung kha a makunga bunpai roi; Pathian chu ei hrangin inzôkna a ni.

⁹Mi chîn tete hi ite ni mahai, mi lianhai khom hi milak chian an ni: Irtênaa khan indom pat an ta; Ite ni loi mai mai nêkin an izâng ual a ni.

¹⁰Irsualnaa hin irnghat no’n lân; Inrûka hin sabeina se no roi. Irchongna a pung khomin kha khan irnghat sa no roi.

¹¹Pathianin voikhat a hrila; E he! hi voihni kin hriat ta; Sinthotheina hi Pathian ta a nih ti hi:

¹²O RENGPA, lungkhamna hi ni ta ngêt a ni: Mi tin an sintho ang taka ni thuan ngai a ni.