Read Hrangkhol INPÂKNA HLAHAI 63 Bible Online

INPÂKNA HLAHAI 63 - Hrangkhol bible

INPÂKNA HLAHAI 63

¹O Pathian, nang chu ki Pathian ni nia; zîng taka nang zong ki ti: Ramchâr tak, tui om loinaa hin ki hringna hi nangma irzukin a dangchâra, ki taksa hin nang a irngai a ni.

²Khaang dênin hmun irthianga khan nang ki en mai kha, Ni sinthotheina le ni roiinpuina hmu hrangin.

³Ni lungkhamna hi hringna nêkin a sa ual sikin ki hmûr hin nang inpâk ki ti.

⁴Khaang dênin ki hring sûngin nang inpâk ki ti: Ni’rhmingin ki kuthai phar ki ti.

⁵Ki hringna hi irtin le sathâiin khop a ta, ki bâi hin raifân hmûr irputin nang inpâk sa ki ti.

⁶Ki zâlhmuna nang kin hriat maia, zâna ni chungchâng thu ki’rngaitua laiin chu.

⁷Nang chu ni changpuitu ni nia, Ni mitha hnuaia raifânin ki izâi hrang a ni.

⁸Ki hringna hin nang a zui ngita: Ni kut chang tiangin a ni kai ngai.

⁹Ki hringna inboi tuma zongtuhai rêk chu irnêng hmun irhnuaihaia khan lût an ti.

¹⁰Khandai sinthotheina kuang pêk ni an ta; Sihalhai dongtum ni ta an ti.

¹¹Reng rêk chu Pathiana raiinfân a ta: Ama songa khomâkirsâm murdi khan chôiirsâng an ta; Milak thu insîr hmanghai bâi chu hîpin a iom hrang a ni.