Read Hrangkhol INPÂKNA HLAHAI 64 Bible Online

INPÂKNA HLAHAI 64 - Hrangkhol bible

INPÂKNA HLAHAI 64

¹O Pathian, ki chardongna thua hin ki’rhâi hi lei inhren lân: Ni doituhai ichiomna ata hi ki hringna inzôk roh.

²Thil saloi thotuhai irfialkhômna ata ni thupin lân, Thil tho’nsualtuhai irdon irhlômnahai ata chu:

³Khahai khan khandai angin an milei an intât inngaia, Thal angin chong khâ takin an irzîka.

⁴Mi sêlnaboi chu hmun fianriala an kâp theina hrangin, Chi loiin irningloiin an kâp thut ngai.

⁵Thil sual thoa khan an irthora; Inrûka châng kam chungchânga khan an chong ngaia; “Tu’n mo khahai kha a hmu hrang?” an tia:

⁶Tho’nchâina an zong suak ngaia; “Sathnem irngai takin kin zong zoi ta,” an tia: An sûng tiang ngaituana le milung chu inthûk tak a ni senga.

⁷Khannisian Pathianin anni kha kâp a ta, Irningloiin thala popin om an ti.

⁸Khaang khan, anni milei ngei khan anni a doi sikin, irtettirin om an ta; anni hmu murdi’n an lu inthik an ti.

⁹Khanchu, mi murdi’n chi an ta; Pathian sintho chu hril an ti, A sintho chu vâr takin ngaitua an ti.

¹⁰Mi felhai chu RENGPAA lôm an ta, amaa khan iamna irnghat an ti; Milung dik tak irput murdihai khan chôiirsâng an ti.