Read Hrangkhol INPÂKNA HLAHAI 66 Bible Online

INPÂKNA HLAHAI 66 - Hrangkhol bible

INPÂKNA HLAHAI 66

¹Irnêng lua murdihaio, Pathian chôiindômin raifân takin khêk unglân:

²A’rhming roiinpuizia chu hla’n sak suak unglân: An pâkna chu roiinpuitir roi.

³Pathian kuang, “Ni sinthohai kha ar khêl bâka! Ni sinthotheina irkhêlzia sikin nang a doituhai chu ni kuang irpelût an ti.

⁴Irnêng lua murdihai hin chubai nang mûk an ta, Nang inpâkin zâi an ti. Ni’rhming inpâkin zâi an ti,” ti roi.

⁵Thoi, Pathian sinthohai hi en roi; Mihriam nâihai chunga a sinthoa hin ichi a iom a ni.

⁶Ama khan tuikhanglian chu irnêng châr an changtira; Mihriamhai khan tuipui kha ke’n an kâia, kha khan ama chunga ei râi a fâna.

⁷A sinthotheina khan kumkhua’n roi a rêla; A mitin nam tin a en ngai: Tehel zonghai chu chôiindôm no ri sehai.

⁸O, mi tinhaio, ei Pathian chu inpâk unglân, Ama inpâkna irhâi kha inhretir roi.

⁹Ama khan ei hringna hi an hringtir maia, Ei kehai hi irphêt phal mah.

¹⁰O Pathian, nangin ni ni fiaa: Tangkarua fia angin ni ni fiaa.

¹¹Nangin lêna ni ni hruai lûta; Kin ruanga hin puakrik tak ni’rnghata.

¹²Mihriamhai, tâli chunga chuangin, kin lu chunga nin fetira; Mei le tui kin pala; Khannisianlân atûn chu nangin hmun inchuma ni ni hruai suak tâka.

¹³Hâlirvôm thilinhlanhai leh ni ina lût ki ta, Ki chonginkunghai kha ni kuang hlen ki ti.

¹⁴Ki hmûrin an sîra, chardonga ki om laia ki bâiin a insîrhai kha.

¹⁵Sa mar tak hâlirvôm thilinhlanhai ni kuang inhlan ki ta, Belra chal hâl mirimhoi le; Sechalhai, kêlhai leh inhlan ki ti.

¹⁶Thoi, Pathian chi murdihaio, irngai roi, Khanchu ki hringna hranga a sintho chu nangni inhretir ki ti.

¹⁷Ama chu ki bâiin kin sama, Ki milei chôiindômin a oma.

¹⁸Ki milung sualna ki’rngaisakin chu RENGPA’N nir ngaitua no ni.

¹⁹Khannisianlân, Pathianin a nir ngaitua tak taka; Ki chongchaina irhâi chu a nir ngai pe ta.

²⁰Pathian, ki chongchaina hlo insamtir loia, Keimaa a lungkhamna inmongtir loi chu inpâkin om ri se.