Read Hrangkhol INPÂKNA HLAHAI 68 Bible Online

INPÂKNA HLAHAI 68 - Hrangkhol bible

INPÂKNA HLAHAI 68

¹Pathian chu thoi sianlân, a doihai chu indarin omhai sianlân; Ama khôkmâktuhai khom kha a makunga laizâm tho ri sehai.

²Meikhu inlêng irhmang angin, anni chu inlêng irhmangtir roh. Khuaihlu hi mei luma a izôi irhmang angin, Mi pualoihai chu Pathian makunga irhmang ri sehai.

³Mi felhai rêk chu lôm takin omhai sianlân; Pathian makunga raiinfân ri sehai.

⁴Pathian chôiindômin hla sak unglân, a’rhming inpâkin zâi roi; Tâlia ramchârhai fe thengtu hrangin chu lamlian hrang sung insip unglân; A’rhming chu RENGPA a ni; a makunga khan raiinfân roi.

⁵Pathian a omna irthianga om kha, Pa nei loihai Pa le meithâihai ngaituatu a ni.

⁶Pathian khan mi malhai chu sûngkua laia an omtir ngaia: Mi intânghai kha a hruai suaka, vânneinaa a hruai lût ngaia: Tehel hmanghai rêk chu ramchâra an omtir ngai.

⁷O Pathian, ni mihai ma hruaia ni hong suaka, Ramchâra ni fe theng lai khan,

⁸Irnêng hi an hnîng dur dura, Irvân khom khin Pathian makunga khan rua an thotira: Sinai tâng lua khom Pathian makunga, Israelhai Pathian makunga khan, an hnîng dur dur kha,

⁹O Pathian, nangin rua tamtak nin thotira, Ni dongtum kha a’rzal lai khan nin dettira;

¹⁰Ni mihaiin kha khan om hmun an khuara. O Pathian, nang chu ni satna’n inrianghai hrang ni sinsiama.

¹¹RENGPA’N thu a pêka, Thurchi hriltu nupang tamtakin an hrilin dara,

¹²Sipaihai le rênghai chu laizâm an thoa, laizâm an thoa: In nghâktunu khan râllâk sum kha a sema.

¹³Vasu mitha tangkarua tuama, A mitha hmor khom rângachak vâr taka tuam angin. Belra irkul kârhaia ni izâl hrang ma ni?

¹⁴Itinrêngthothei khan khataka rênghai an darhtir lai kha, Zalmon tânga ivur tâk lai ang a ni.

¹⁵Basan tâng chu Pathian tâng a nia; Basan tâng chu tâng irsâng tak a ni.

¹⁶Tâng irsâng takhaio, Pathianin a omna hranga a inthang nuam chu ithoa mo hnarsaa nin ien? A ni, RENGPA chu kha khan kumkhua’n a iom mai hrang kêng.

¹⁷Pathian tâli chu a sîng a sîng, a sâng a sâng tamtak a ni: RENGPA chu Sinai tânga a om ang khan, Khahai laia khan hmun irthianga a om ta.

¹⁸Nang chu chung tiang ni kâia; Ni ichelhai kha suakin ni hruaia; Mihriamhai ata thilpêkhai ni donga, A ni, tehel zonghai laia khom; RENGPA Pathian kha an kuang a om theina hrangin.

¹⁹RENGPA, kin puak a ni tina ni pêl petu, A ni saninhringtu Pathian chu inpâkin om ri se.

²⁰Pathian chu ei ta hrangin saninzôktu Pathian a ni; Thina ata suaknahai chu RENGPA Jehova ta a ni sa.

²¹Khannisianlân Pathianin ama doituhai lu chu sât irphalphat a ta, A thiamloinaa la fe thiaia lu vun sam irbuk tak a ni.

²²RENGPA’N, “Basan ram ata nang hruai nôk ki ta, Tuikhanglian mong inthûk tak ata chu nang hruai nôk ki ti.

²³Ni ke chu thisena ni phûm theia, Ni ui lâkhai khan ni idoihai ata dongtum a nei theina hrangin,” a tia.

²⁴O Pathian, ni ife laihai an hmua, Ki Pathian ki inlaltak hmun irthianga fe laihai chu.

²⁵Dôngmate khuang suktuhai laia khan, Hla saktuhai an fe masaa, irhaihoi tumtuhai khan an zuia,

²⁶Inkhômna inhaia khan Pathian inpâk unglân, O Jakoba irchihai RENGPA chu inpâk roi.

²⁷Nâi mitum Benjamina-haiin ma hruaiin Juda irchia mi lianhai le an upahai, Jebuluna mi lianhai, Naftalia mi lianhaiin an zuia.

²⁸Ni Pathian khan ni sinthotheina chu thu a pêka: O Pathian, kin ta hranga thil ni itho chu inhrât ro.

²⁹Jerusalema ni biak in sikin rênghaiin lômmanhai nang la hong chôi pe an ti.

³⁰Sahrâng lâiluang kâra om chu hâlin lân, Nam dang sehrâtchal le sehrâtte, lômhai chu ngô roh. Kûna an tangkahai ni kuanga an inhlan mâka chu; Irsual vai nuamhai chu indartir roh.

³¹Aigupta ram ata milianhai hong suak an ta; Ethiopia-hai chu an kut Pathian tiang phar hrangin irhnot an ti.

³²Rammuala ram murdihaio, Pathian chôiindômin hla sak unglân; O, RENGPA inpâkin zâi roi;

³³Irvânhai irvân khorsiang ata omhai chunga chuanga khan; Irngai ta, ar hâi a suak e, irhâi irkhêl tak chu.

³⁴Pathian kuanga khan hrâtna pe roi: A roiinpuina chu Israelhai chunga a oma, a hrâtna chu irvân dumhaia khin a om.

³⁵O Pathian ni hmun irthianghai ata khan ichi ni iom a ni; ama’n Israelhai Pathian ngei khan a mihai kuang hrâtna le sinthotheina a ipêk ngai a ni. Pathian chu inpâkin om ri se.