Read Hrangkhol INPÂKNA HLAHAI 7 Bible Online

INPÂKNA HLAHAI 7 - Hrangkhol bible

INPÂKNA HLAHAI 7

¹O RENGPA ki Pathian, nangmaa ki iamna ki’rnghata: A ni irzûltuhai murdi ata ni saninhringin ni saninzôk roh:

²Khanchu, saninzôktu om loiin, kâmkeibaknei angin, Ki hringna hi inpot chitin, soisakna ti.

³O RENGPA ki Pathian, hianga lei ti ki nia, Ki kuta sualna lei om a nia,

⁴Ki rual chu sualnaa thuan ki lei ni’n chu, Dikloi taka ki râlhai inzôk mani ki ni’n chu.

⁵Ki râlhaiin ni’rzûlin ni phâkhai sianlân; Ki roiinpuina khom hi pil kâra phûm ri se.

⁶O RENGPA, ningmurin thoiin lân, Ki râlhai ningmurna doiin irthok roh; Nangma ngei irthokin lân, ni changpui roh! Dikna hi nangma’n ni zong ngai a ni.

⁷Khasikin mitin ni kôl vêla hong bûm nôkin lân; Chung tianga irthokin an chunga roirêl roh.

⁸RENGPA’N mitin roi a rêl ngai: O RENGPA, keimaa ki felna le ki lungrîl satna a om mai angin roi ni rêl roh:

⁹O, mi siahai pualoina chu hong mong ta sianlân, mi felhai chu indet roh: Pathian fel tak chu milunghai a fia ngaia.

¹⁰Ki phô chu Pathian kuang a om, Ama chu milung diktak irput saninhringtu a ni.

¹¹Pathian chu roirêltu fel tak a ni, a ni, a nitin mi sualhai chunga lung hoiloina nei Pathian a ni.

¹²Mi ar heikîr no’n chu ama chu a khandai intât inngaih a ta, A thal ngul chu kam chian a ti.

¹³Thina hriamhreihai chu ama thatna’n a siam diam sa tâka; A thalhai chu chok theiin a siam ta.

¹⁴En ta, mi sualhai thil saloi an ngaitua lam so! Buaina an phana, milak an hmang ngai.

¹⁵Khannisianlân, mi khitna hranga an châng kama khan, Anni dên an khit ta.

¹⁶An tho’nsualna kha an chunga dên a hong kîr nôka, An hnarsa siatna khom an chunga dên a ichum nôk a ni.

¹⁷RENGPA chu felna sikin a kuang lômthu insîr ki ta, RENGPA, Anchungtaka inpâkin zâi ki ti.