Read Hrangkhol INPÂKNA HLAHAI 71 Bible Online

INPÂKNA HLAHAI 71 - Hrangkhol bible

INPÂKNA HLAHAI 71

¹O RENGPA, nangmaa khan ki iamna ki’rnghat ngaia: Itika khom mualinphoiin nin om tir no ro.

²Ni felna sika ni saninzôkin, ni sansuakin lân: Keima tiang hin ni beng zuang do’n lân, ni saninhring roh.

³Ki ta hrangin omna lungpui, ki fe mai theina hrang lei ni ro: Nangin ni saninhringna hrangin thu ni pêka; Ki kulpui le ki lampui ni nia,

⁴O ki Pathian, mi pualoihai kut ata ni sansuak ro, Mi felloi le nunse tak kut ata chu.

⁵O RENGPA Pathian, nang chu ki sabeina chu ni ni: Ki nâipangte ata ki iamna chu ni ni.

⁶Ka nu sûng ata ki suak ni ata irthokin nang ki’rhnêla; Ka nu sul ata ni lâk suaktu ni nia, Nang inpâk mai ki ti.

⁷Mi tamtak irngaiin thilirkhêl ang ki nia, Khan khom ni sianlân nang chu ki irbîkna det tak ni ni.

⁸Ki bâi hi nang inpâkna’n sip a ta, Sûn sôtin ni chôiindômna’n sip sa a ti.

⁹Ki tar tikin ni paithâk no’n lân; ki’rnak a chuai tikin ni rotsan no ro.

¹⁰A ni doituhai khan ki chungchâng thu an insîra; Ki hringna inruangtuhai an chong khôma.

¹¹“Pathianin a rotsan ta: Irzûl unglân, chel roi; saninzôktu hrang zel om mahai,” tiin.

¹²O Pathian, ni hla viat no’n lân: O ki Pathian, ni changpui hrangin irhnot roh.

¹³Ki hringna doituhai chu mualinphoi le irhmangin omhai sianlân; Ki siatna hrang zongtuhai chu hrilinsiatin le inzakna’n irkhuhai ri se.

¹⁴Khannisianlân keiin chu nang sabei mai ki ti, nang lan pâk sa ual ual ki ti.

¹⁵Ki bâi hin ni felna thu hril a ta, sûn sôtin ni saninhringna thu hril sa a ti; A tam hrang dôr chu inhre ma ung.

¹⁶O RENGPA, Pathian sintho roiinpui takhai leh ki honga; Ni felna, nangma felna thu vai insîr ki ti.

¹⁷O Pathian, ki nâipangte ata nangin ni nir chutira; Atûn ten ni sintho irkhêlhai chu kin hriattir ngai.

¹⁸A ni, O Pathian, ki tara ki lu a chuak hnung khomin ni rotsan viat no ro; Ni hrâtna hi thoiinthar nôkhai kuang le, Ni sinthotheina hi la hong om hranghai murdi kuang kin hriattir mâka chu.

¹⁹O Pathian, ni felna khom ar sâng tak tak a ni; O Pathian, nang thil roiinpui takhai thotu, Nangma ang hi tu mo om?

²⁰Nang, charindongna tamtak le irkhêltak ni nin hmutirin chu, Nin hringtir nôk a ti, Irnêng inthûk ata ni hruai suak nôk a ti.

²¹Nangin ki roiinpuina nin pung pe’n lân, Zuang irhei nôkin irtharngamna ni pe ro.

²²Serânda’n nang inpâk sa ki ta, O ki Pathian, ni thutak ngei chu inpâk ki ti. O nang Israelhai mi irthiang, perkhuang leh nangma inpâkin zâi ki ti.

²³Nangma inpâka ki zâi tikin ki bâi hi lôm tak tak a ta; Ki hringna ni irtan khom hi lôm tak tak a ti.

²⁴Ki milei khom hin sûn sôtin ni felna thu insîr a ti: Ki siatna hrang zongtuhai chu mualinphoiin an inzak tâka.