Read Hrangkhol INPÂKNA HLAHAI 72 Bible Online

INPÂKNA HLAHAI 72 - Hrangkhol bible

INPÂKNA HLAHAI 72

¹O Pathian, ni roirêlnahai kha rêng pe’n lân, Ni felna chu rêng nâipa pe roh.

²Ni mihai chu felna’n roirêl pe a ta, Ni mi inrianghai chu roirêlna felin roirêl pe a ti.

³Tâng lian le tâng chînhai hin felna’n mihai kuang irtharngamna zuang intung an ti.

⁴Ama khan mi laia inrianghai chu roirêl pe a ta, Invâi nâihai chu saninhring a ti, Nêpsiatu rêk chu nôi a ti.

⁵Misa khi a om sûng chu nang chi an ti, Tha om sûng ten khomin, irlo om sûng murdia chu.

⁶Ama chu hloisûl irnoi chunga rua angin tâk a ta: Irnêng infâtu ruatui ang dênin.

⁷A hring lai khan mi felhai chu indôn nut nut an ta, Irtharngamna irkhêl tak chu indôn nut nut sa a ta, tha a boi mâka chu.

⁸Ama chu tuikhanglian ata tuikhanglian dang dên khomin ircham nei sa a ti, Tuipui ata kôlkung dên khomin.

⁹Ramchâra omhai chu a makunga kûn an ta; Ama doituhai khomin vâiphin inliak an ti.

¹⁰Tarsis ram le chômbung rênghaiin lômman hong inhlanhai sianlân, Arab rêng le Seba rênghai khomin thilpêkhai hong chôi ri sehai.

¹¹A ni, rêng murdi chu a makunga inbok an ta: Nam tinrêngin a sintho an ti.

¹²Invâiin a khêkin ama chu saninzôk a ta, Mi inriang, changpuitu nei loi khom kha saninzôk a ti.

¹³Mi inriang le invâihai chu lunginkham a ta, Invâihai hringna chu saninhring a ti.

¹⁴An hringna chu nêpsiana le nunrôngna ata irtan a ta, An thisen chu ama irngaia chu hlutak a ini hrang a ni.

¹⁵Khan, hring an ta; Seba ram rângachak chu ama pêk ni a ta; Mihaiin ama chu chongchai pe mai an ta; Sûn sôtin satvur an ti.

¹⁶Irnênga, tâng chunghaia hin, bu tamtak om a ta; A vûi chu Lebanon angin inhnîng siam siam a ta, Khuaa mihai chu irnêng hloisûl angin indôn nut nut an ti.

¹⁷A’rhming chu kumkhua’n dâi no ni: A’rhming chu misa a om sûng chu dâi loiin om mai a ta: Mihai chu amaa khan satvurin om an ta; Nam tinrêngin ama chu vânnei ti an ti.

¹⁸RENGPA Pathian, Israelhai Pathian chu, inpâkin om ri se, Ama vai hin sinirkhêl a tho ngaia:

¹⁹A’rhming roiinpui tak hi kumkhua’n inpâkin om sa sianlân; Irnêng pumpui khom hi a roiinpuinaa insipin om ri se. Amen, Amen.

²⁰Jesaia nâipa Davida chongchainahai chu a mong ta.