Read Hrangkhol INPÂKNA HLAHAI 73 Bible Online

INPÂKNA HLAHAI 73 - Hrangkhol bible

INPÂKNA HLAHAI 73

¹Pathian chu Israelhai chunga a sân a sa mai, Milunga irthianghai chunga khan.

²Khannisianlân keima’n chu ki sir inchâi vâng vânga; Ki ke pêthai hi ar pil vâng vâng a ni.

³Mi pualoihai vânneizia ki hmuin, Mi irsonghai chu ki’rzuka.

⁴An thi lai khan tuangna zel nei mahaia; An hrâtna chu a det uala.

⁵Mi dang anga intakin om mahaia; Mi dang anga soisakin om ual mahai.

⁶Khasikin lârirpâkna khan thîrhrui angin an ringa an zêla; Nunrôngna chu silkai angin a tuama.

⁷Mar sikin an mit a pônga: Milunga thu nuamlam nêka irkhêl an neia.

⁸An innuisana, sual takin nêpsiana thu an insîra: Lârirpâk takin an chong ngai.

⁹An bâi chu irvânhaia khin an siaa, An milei chu irnêng hi ar fang suam ngai.

¹⁰Khasikin a mihai chu khataka khan an kîr nôka, Tui khilâta sip chu an inpai ripa.

¹¹“Pathianin itin mo inhria a ta? Anchungtakin inhre suak hrang ma ni?” an tia.

¹²En ta, hihai hi mi pualoihai an ni hi; Nuamning taka om maiin an irchong tîr tîr ngai.

¹³A ni, mâkana zelin, ki milung hi an fâitira, Ki kuthai sêlna boinaa ki irsûk a ni.

¹⁴Sûn sôtin soisakin ki oma, A nitin halirchu’n ki oma.

¹⁵“Khaang khan insîr ki ti,” hong ti ta inlân; Irngai ta, ni nâihai irlo chunga vârirlet taka tho hong ni ki ti.

¹⁶Kha kha kin hriat theina hrangzia ki ngaitua’n, ki hrangin a intak hrai a ni.

¹⁷Pathian hmun irthianga lût ki ta, An mongna hrang chu ki ngaitua mâka chu.

¹⁸Anni chu hmun irnâl takhaia ni siaa: Siatnahaia ni paithâk ngaia.

¹⁹Ithoa mo mitkhapkâra an iramchit tâk mani o! Thil irkhêl takhaia inboipaiin an iom ta a ni.

²⁰Zâna irmang khua a vâra a iboi ngai angin, O RENGPA, ni meng tikin anni chu irhmangtirhai ro.

²¹Ki milung hi a beiindonga, Ki lungrîla khom isun angin ki oma:

²²Mi’nmôl le ite inhre loi ki nia, Nangmaa khan ramsa ang chian ki ni ngai hi.

²³Khannisianlân ni kuanga ki om maia: ki kut chang tiang hi ni lei chel ngaia.

²⁴Nangin ni lei inkungna’n ni hruai ni ta, Kha zoi tika chu roiinpuinaa khin ni lôm a ti.

²⁵Irvâna khin nang no chu tu mo ki ini? Irnênga khom hin nang no chu ki inuam tûte om mahai.

²⁶Ki taksa le ki milung hi a’rzal tâka: Khannisianlân Pathian chu kumkhuaa ki milung hrâtna hrang le ki dongtum hrang a ni.

²⁷Irngai ta, nangma ata hlataka omhai chu an irhmang hrang a ni: A uiresantu murdi chu nir hmangtir ta.

²⁸Keima ta hrang rêkin chu Pathian nâi hi a isa a ni: RENGPA Pathian chu ki inzôknaa ki hmanga, Ni sintho murdi thu ki hril theina hrangin.