Read Hrangkhol INPÂKNA HLAHAI 74 Bible Online

INPÂKNA HLAHAI 74 - Hrangkhol bible

INPÂKNA HLAHAI 74

¹O Pathian, ithoa mo kumkhua hrangin ni ni ipaithâk? Ithoa mo ni sa vâina hmuna belrahai chunga hin ni milung a ir-ût mai?

²Ni mihai inkhômhai, tianlaia ni irchôk, Nam irchon hrangin ni irtan kha, inhre mai ro; Ni omna ngai Zion tâng le.

³Siat chit tâk chu hong irfang ta, Doituhai hmun irthianga khan thil sual tinrêng an tho tâk hi.

⁴Nangma doituhai ni mihai inkhômhai laia an khêk mur mura; An irsinsianahai chu irsinsiana hrangin an târ tâka.

⁵Mi, rampuia thing Hreipuia phûrhai angin an inlang.

⁶Atûn chu a thil sin enhoihai murdi chu hreite le mârtûlhaiin an insiathai tâka.

⁷A hmun irthiang chu an hâla; Ni’rhming omna chu irnênga ngîm rak ang dôrin an ûm tâka.

⁸An lungrîla chu, “Insiat zithai ei ti,” an tia. Hi rama Pathian inkhômna in murdi hi an hâl siat zoi tâka.

⁹Kin irsinsianahai chu hmu ta ma unga; Deipu rêng rêng kin laia om mahai.

¹⁰O Pathian, doitu’n chu i dôr ten mo nang a hril insiat hrang? Râlin chu kumkhua’n nang a insîr insiat hrang ma ni?

¹¹Ithoa mo ni kut, ni kut chang tiang kha mi ilâk mo an tia? Kêlsua nôkin lân, inboipaihai roh.

¹²Khannisianlân, Pathian chu tianlai ata ki Reng a ni, Irnêng inlâina taka saninhringna siam ngaitu chu.

¹³Nangma’n chu ni hrâtna’n tuikhanglian kha a’rsentira: Nangma’n chu tuia dragonhai lu kha nin khoitira.

¹⁴Nangma’n chu Levia thân luhai chu nin khoi chita, Ama chu ramchâra mi omhai kuang khan bu ngheiin ni pêka.

¹⁵Nangma’n chu tuihnârhai le tuipûthai nin pût suaktira; Nangma’n chu tuipuihai nin kangtira.

¹⁶Sûn hi ni ta a nia, zân khom hi ni ta a ni; Nangma’n misa le tha ni siama.

¹⁷Nangma’n irnêng ramri murdihai nin rêta; Nangin fûr le sâl nin omtira.

¹⁸O RENGPA, hi hi inhre mai ro, doituhai khan nang an hrilsiata, Pathian ngaisak loi mihai khan nir hming an insîr insiat ngai.

¹⁹O, ni vasu hringna hi ram sahrâng kuang khan pe viat no ro: Ni mi inrianghai hringna hi kumkhua’n irnghil no ro.

²⁰Thuthung kha zuang ngaisak ro: Irnêng hmun inthim laihai chu nunrôngna omna’n a sip tâka.

²¹O, nêpsiana tuanghai chu mualinphoiin inom no’n lân; Inrianghai le farahai khan nir hming inpâk ri sehai.

²²O Pathian, thoiin lân, nangma thu chu ni bingin insîrin lân. Mi’nvêtin chu sûn sôtin nang a insîr insiat kha inhre mai roh.

²³Nangma doituhai irhai chu irnghil no ro: Nang a doituhai irhai irse mer mur chu a hong intông mai ngai a ni.