Read Hrangkhol INPÂKNA HLAHAI 75 Bible Online

INPÂKNA HLAHAI 75 - Hrangkhol bible

INPÂKNA HLAHAI 75

¹O Pathian lômthu nang kin hril; Lômthu nang kin hril, nir hming anai sikin: Mihaiin ni sintho irkhêl tho thuhai kha an hril ngai.

²A zoro ki inkunga khan Dik takin roirêl ni ti.

³Irnêng le a chunga om murdihai chu an zôi zoi ta: Keima’n a chopuihai kha ki iphun a ni.

⁴Mi irsorhai kuang khan, “Irsor takin om no roi,” ki ti saa. Mi siahai kuang, “Irpâk no roi,” ki ti saa.

⁵Mi siahai kuang khan, “Irsor ta no roi ki ti pea,” a tia.

⁶Irsângna chu sak tiang ata ni ual ma, thang tiang ata ni ual ma, sim tiang ata ni ual sa mah.

⁷Pathian chu roirêltu a ni ual: Ama chu inkhat an lômtira, inkhat a’rsângtir ngai.

⁸RENGPA kuta chu khilât a oma, a uain chu a phûla: Thil dang leh inchok polin a sipa, khatak ata kha a bun suaka: A’rnôihai ten khom irnênga mi siahai murdi’n infâipai rip an ti.

⁹Khannisianlân kei chu kumkhua’n nang inhriattir ki ta, Jakoba Pathian inpâkin zâi ki ti.

¹⁰Mi siahai khom irsortir ki ti; Mi felhai rêk chu irsângtirin om an ti.