Read Hrangkhol INPÂKNA HLAHAI 77 Bible Online

INPÂKNA HLAHAI 77 - Hrangkhol bible

INPÂKNA HLAHAI 77

¹Ki’rhaiin Pathian chu insam ki ta, ki’rhaiin Pathian ngei kha insam ki ta, Ama khan keima tiang a beng zuang dô a ti.

²Ki chardong nî’n chu RENGPA ki zonga: Ki kut hi zâna khom inthâ loiin phar mai ki ti; Ki hringna hin irtharngam nuam maka,

³Pathian kin hriat maia, ki buai ngai: Ki’rngaituaa, ki’rtha hi a’rzal ngai.

⁴Zân sôtin a nin mengtir mai ngaia: Chong theiloi rakin ki char a dong ngai.

⁵Tianlai nikhuahai ki ngaituaa, Tianlai kumhai khom.

⁶Zâna ki’rngaitua ki’rngaituaa, Ki’rdon irhlôma, ki’rsam irhlôm ngai; Ki’rtha khomin sathnem irngai takin a zonga.

⁷RENGPA khan kumkhua’n a inthâ hrang mani o? Itika khom a ilôm ta loi hrang mani o?

⁸A lungkhamna chu kumkhua’n a iboi theng thai ta hrang mani o? A thu’nkung chu irlo tin tin dênin a iboi hrang mani o?

⁹Pathianin lungkhamna a irnghil mani o? Ninginmurin an rennahai chu a ikhâr ma ni tâk?

¹⁰Khan, “Kha kha ki hrât loina sika a ni; Khannisianlân Anchungtaka kut chang tiang kumhai kha inhre mai ki ti.

¹¹RENGPA sintho thuhai kha insîr ki ta; Tianlaia ni sintho’rkhêl thohai kha inhre mai ki ti.

¹²Ni sintho murdihai kha ngaitua sa ki ta, Ni sinthohai khom kha sût ki ti,” ki tia.

¹³O Pathian, ni lampui chu hmun irthianga a oma: Kin Pathian ang hi Pathian roiinpui tu mo om hrang?

¹⁴Nang chu sintho’rkhêl tho ngaitu ni nia: Mi tin laia ni hrâtzia nin hriattir ngaia.

¹⁵Ni bânin mihai ni sansuaka, Jakoba le Josefa nâihai chu.

¹⁶O Pathian, tuihaiin nang an hmua; Tuihai khan nang an hmua, nang an chia; Tui inthûk takhai an inthing sa a ni.

¹⁷Sûmhai khin tui an bunpaia; Irvânhai khin irhâi an insuaktira: Ni thalhai khom a’rtêk lo lopa,

¹⁸Ni khonri irhâi chu kêllaiherin a oma; Kôlirtêkhai khan rammual hi a êl dop dopa: Irnêng hi inthingin an hnîng dût dût a ni.

¹⁹Ni lampui chu tuikhangliana a oma, Ni lampuihai chu tui irzat taka a oma, Ni hnunghai khom hmu thei ni mah.

²⁰Mosia le Arona kutin ni mihai chu belra rual angin ni hruai ngai.