Read Hrangkhol INPÂKNA HLAHAI 78 Bible Online

INPÂKNA HLAHAI 78 - Hrangkhol bible

INPÂKNA HLAHAI 78

¹O ki mihaio, ki dân thua hin beng hong dô unglân: Ki bâia thuhaia hin beng hong dô roi.

²Chongirkhek thu’n ki bâi âng ki ta; Tianlai thurîl insîrhai kha insîr suak ki ti.

³Khahai kha ei mikuarin ei inhriata, ei lungrîlin an hriat saa, Ei irchibulhai khomin an ni ihril kha.

⁴Khahai khan an nâi le tehai kuang hin thup no ia, Thoiinthar la hong om hrang kuang RENGPA inpâkna thu le, A hrâtzia le a sintho’rkhêl tak thoziahai kha hril ual ei ti.

⁵Jakobahai laia thu’n hriattir an dettira, Israelhai laia dân an kunga, Khahai kha irchibulhai kuang thupêkin a pêka. Anni chu kha thuhai kha an nâihai kuang inhriattir hrangin:

⁶Thoiinthar la hong om hrang, nâipang la hong suak hranghai khan, an inhriat theina hrangin; Khahai kha an thoia, an nâihai an la hril irzôt maina hrangin:

⁷An sabeina chu Pathiana an irnghat theia, Pathian sinthohai chu irnghil mahaia; A thupêkhai chu an zôm ualna hrangin.

⁸Le, an irchibulhai anga, Irlo tukullian le tehelzong; Irlo milung siam indik loi, Pathian ata lungrîl iamom hong irput an om loina hrangin.

⁹Efraima irchihai chu râlthuama irbela, thal ngul chôiin, Irbei nîa chu laizâm an thoa.

¹⁰Pathian thuthung chu zôm mahaia, A dâna om nuam sa mahaia,

¹¹A sinthohai chu an irnghila, A sintho’rkhêl tho a irhmutirhai leh khan.

¹²An irchibulhai mithmua sinirkhêl tak a tho ngai, Aigupta rama, Zoan phâia khan.

¹³Tuikhanglian chu a’rsentir phata, an fetirhaia; Tuihai chu i i ei isia rum angin an ngîrtira.

¹⁴Sûna chu sûmin a hruaia, Zân sôtin mei vârin a hruai sa ngai.

¹⁵Ramchâra khan lungpuihai an khoitira, Tui inthûk tak ang dênin, nuam dôra in hrang a pêka.

¹⁶Lungpui ata chu tuidunghai an suaktira, Tuihai chu tuidunghai angin an luang intâktira.

¹⁷Khaang dôr khomin a chunga thil an la tho’nsuala, Ramchâra khan Anchungtaka chunga khan tehel an zonga.

¹⁸An irzuk inboina hrangin fâkrua ngênin an milungin Pathian an fiaa.

¹⁹A ni, Pathian an hrilsiata, “Ramchâra hin Pathianin khahai ar fûktir thei moa?

²⁰Irngai ta, lungpui kha a zêma, tuihai kha hong pût suakin, ivadunghai kha a hong lêt zun zun tâka; Bu khom a pêk thei zoi moa? A mihai ta hrangin hmê mo ar fûk theia?” an tia.

²¹Khanchu RENGPA’N a lei inhriata, a ning an mur tâka: Jakoba-hai chunga mei a zuang chok suaka, Israelhai chunga ningmurna a hong pung tâka;

²²Pathian iam mahaia, A saninhringna khom an iam no sikin.

²³Khannisianlân chung tiang irvân dumhai khi an hong pea;

²⁴An fâk hrangin mana an tâktira, Irvân bu a ipêk a ni.

²⁵Mihriamhaiin mi hrâthai bai kha an fâka: khopna hrang rakin bu a zuang pêka.

²⁶Nisua tianga phâivua chu irvâna an thotira: A sinthotheina’n sim phâivua kha a hruaia.

²⁷Vâ chu bâli ang dôrin an chunga an tâktira, Vâ mitha nei chu tuikhangliana chiai zât dôrin.

²⁸An riakhmun laia an tâktira, An omna kôl vêlhaia khan.

²⁹Khanchu an fâka an khopa, An irzuk tak kha a ipêk tâk a ni.

³⁰An irzuk la boi maka, An bu chu an bâia a la oma.

³¹Kha laitaka khan Pathian ningmurna a zuang punga, An mi hrât hrâthai senkhat a thata, Israel ruathartehai chu a zêm polhaia.

³²Khaang dôra khom khan thil an la tho’nsuala, A sintho’rkhêl thohai kha iam ual hliak mahai.

³³Khasikin an dam sûng nikhuahai kha mâkana’n an boitira, An dam sûng kumhai chu chitna’n an boitira.

³⁴A thathai rikipin ama an zong ngaia. An kîr nôka, zîng taka Pathian an zong ngaia.

³⁵Pathian chu an lungpui a nih ti le Pathian Anchungtaka kha an irtantu a nih ti an inhriat suak ngaia.

³⁶Khannisianlân ama chu an bâiin an inpâk pa paia, An mileiin an kuang milak thu an insîr ngai.

³⁷An milung kha amaa khan dik maka, An milunga khan iamom sa mah.

³⁸Khannisianlân, ama chu inrennaa a sip sikin an pualoina kha a ngaidama, anni kha inboihai ma: A ni, voi tamtak a ningmurna kha a lâk kîra, A ninginmurna kha a rêngin insuak nuam ngai mah.

³⁹Taksa vai a nih ti an hriat chiana; phâivua, kîr nôk loi hranga tho thengthai ngai ang hi.

⁴⁰Ramchâra khan a chunga tehel an va zong intama. Ramchâra khan ama kha bei an indong intam bâka!

⁴¹An irhei kîr nôkin Pathian an fiaa, Israelhai Mi Irthiang chu an innuartir ngai.

⁴²A kut chu inhre mai mahaia, Doitu ata a saninzôk nî chu inhre mai ngai mahai.

⁴³Khaanga Aigupta rama a’rsinsianahai a siaa, Zoan rama a sinirkhêlhai a sia saa;

⁴⁴An vadunghai chu thisena an changtir sa kha, khanchu in thei ta mahaia.

⁴⁵An laia thoivâi tamtak a tîra, kha khan a fâkhaia; Uichokhai a tîr saa, kha khan an boitirhai tâka.

⁴⁶An thil mônghai khom kha longak a pêka, An sinsôl ra chu khâihmimse a pêk saa.

⁴⁷An grep hruihai chu irialin a thata, An theipui kunghai khom kha ivurin a that saa.

⁴⁸An sahai khom kha irial a pêka, An sa pâlhai kha michêk an dêngtir saa.

⁴⁹A satêna a ningmurna kha an chunga a chum, Ningmurna hai, lunghoi tak tak hai, Lungzîngna hai hi, Thil saloi tak intungtu tîrtôn pâl kha.

⁵⁰A ninginmurna hrang khan lampui a siam pea; A hringna chu hrî a pêk lik tâka;

⁵¹Aigupta rama nâilutîr om murdi a thata, Hama puan inhaia an hrâtna ra masa takhai chu:

⁵²Khannisianlân ama mihai chu belra angin a hruai suakhaia, Belra pâl angin ramchâra khan a hruaia.

⁵³Satakin a hruaia, khanchu ite chi ta mahai: Khannisianlân tuikhanglian khan an râlhai kha ar khû zoi tâka.

⁵⁴Khan, a hmun irthiang ramri kha a hruai intunga, Hi tâng, a kut chang tiang a ilâk hi.

⁵⁵Nam tin chu an makunga an hnot suaka, Anni kha hruia irkhi’n irchon hrangin a sema, An puan inhaia khan Israel namhai kha an omtir tâka.

⁵⁶Khannisianlân, Pathian Anchungtaka kha an fiaa, a chunga tehel an zonga, A thu inhriattirhai kha zôm mahai;

⁵⁷Irheikîrin, an irchihai angin vârirlet takin an tho lik tâka: Thal ngul iamom loi angin an fe kôia.

⁵⁸An hmun irsânghaiin ama kha an ninginmurtira, An millim siamhaiin an inhnarsatira.

⁵⁹Pathianin kha kha a lei inhriatin a ning an mura, Israelhai kha a sân an tirhai tâka:

⁶⁰Khanchu Silo biak in, Mihriam laia a puan in sia kha a rotsana;

⁶¹A hrâtna kha suaka an mantira, A roiinpuina chu doitu kuta an mantir saa.

⁶²A mihai kha khandai kuang a pêka; A’rchon chunga khan a ning an mur tâka.

⁶³Meiin an ruathartehai kha a kâng irhmanga, An dôngmatehai khan inneina hla rêng rêng nei ta mahai.

⁶⁴An Ochaihai kha khandaia intûktirin an oma; An meithâihai kha chap viat viat mahai.

⁶⁵Kha zoro lai khan RENGPA chu, mi an ina an ihar angin, a har tâka, Mi hrât uain sika khêk angin.

⁶⁶Ama doituhai chu a zêm inkîrtira, Kumkhuaa irhming siatna an hlotir tâka.

⁶⁷Kha no khom kha Josefa puan in kha nuam maka, Efraima nam chu inthang sa maka;

⁶⁸Juda nam chu an thang lika, A lungthung Zion tâng chu.

⁶⁹A in irthiang chu irvân irsânghai ang khin a sina, Kumkhuaa hrangin an dettir irnêng ang hin.

⁷⁰A siahlo Davida kha an thanga, Belra pâl laia irthokin a kaisuaka.

⁷¹Belrapui a tê hruaihai zuitu ata a hruai suaka, A mihai Jakoba-hai le ar chon Israelhai infâ hrangin.

⁷²Khanchu ama khan a milung satna ang zêlin annihai kha an fâa; A kut thiamna’n a hruai tâka.