Read Hrangkhol INPÂKNA HLAHAI 80 Bible Online

INPÂKNA HLAHAI 80 - Hrangkhol bible

INPÂKNA HLAHAI 80

¹O Israelhai vêngtu, Belra pâl anga Josefa-hai hruaitu, mikuar lei do roh; Nang cherubhai chunga toi kha, zuang vâr suak roh.

²Efraimahai le Benjamina-hai le Manasea-hai mithmua khan ni hrâtna kha insua’n lân, Ni saninhring hrangin zuang roh.

³O Pathian nir heikîrtir nôkin lân; Ni hmêl kha invârin lân, khanchu saninhringin om kin ti.

⁴O RENGPA, sipaihai Pathian, Idôr ten mo ni mihai chongchaina chunga hin ning ni inmurtir hrang?

⁵Anni kha mitrithi baiin nin fâa, Mitrithi hi in hrangin irtêna lian takin ni pêk ngai.

⁶Nangin kin kôl vêla mihai hrangin irsêlnaa ni ni siam ngaia, A ni doituhai chu an innui suam ngai.

⁷O sipaihai Pathian, nir heikîrtirin lân; Ni hmêl chu invârtir ro, khanchu saninhringin kin iom hrang a ni.

⁸Aigupta ram ata grep hrui ni hong lâka: Nam tin chu nin hnot suaka, ni phun tâka.

⁹A maton nin fâi thiaia, Inthûk takin irzung a kaia, ram chu a lua zit tâka.

¹⁰Tânghai chu a pop tuamin an oma, A ônhai chu Pathian sidar thinghai ang dên a ni.

¹¹A ônhai chu tuikhanglian dênin ar zâm suaktira, An chor irnoihai chu vadungpui dênin.

¹²Ithoa mo a pâlhai chu ni insiat? Lampuia fe murdi’n an inpot thâk tâk hi.

¹³Ramhnuaia sangal chu an siata, Ramsahai khomin an fâk ngai.

¹⁴O sipaihai Pathian, lungkham takin irheikîr nôk roh,

¹⁵A kung ni kut chang tiangin a phun le, A ôn ni ta hrangin ni inngartir leh hin.

¹⁶Meia a kâng ta, irkitin a om ta: Ni hmêla halirchûna sikin an irhmang ngai.

¹⁷Ni kut chu ni chang tiang mi chunga om ri se, Mihriam nâipa ni hranga nin hrâttir chunga hin.

¹⁸Khanchu nang kîrsan no ni ung: Nin hartirin lân, khanchu nir hming irlam kin ti.

¹⁹O RENGPA, sipaihai Pathian, nir heikîrtir nôkin lân; Ni hmêl chu invârtir nôk ro, khanchu saninhringin om kin ti.