Read Hrangkhol INPÂKNA HLAHAI 85 Bible Online

INPÂKNA HLAHAI 85 - Hrangkhol bible

INPÂKNA HLAHAI 85

¹RENGPA, ni ram chunga hin ni lôma: Jakoba-hai, suaka an iom chu ni hruai kîr nôk tâka.

²Ni mihai pualoina ni ngaidama, An sual murdi nir khû zoi tâka.

³Ni ningmurna murdi chu ni lâkpaia; A satêna ni ningmurna kha nir heisan tâka.

⁴O ni saninhringtu Pathian, nir heikîrtirin lân, Kin chunga ni ninginmurna chu inmong roh.

⁵Kin chunga kumkhua’n ni ning ni inmurtir hrang ma ni? Ni ninginmurna chu irlo tin tin dênin ni inlangtir mai hrang ma ni?

⁶Nangmaa khan ni mihai an raifân theina hrangin ni inhartir nôk loi hrang ma ni?

⁷O RENGPA, ni lungkhamna chu nin hmutir nôkin lân, Ni saninhringna chu ni pe sa roh.

⁸Pathian RENGPA thu’nsîr hrang chu irngaitua ki ti: A mihai le a mi irthianghai kuang irtharngamna thu a insîr hrang a ni: Khannisianlân anni chu invêtna tiang irhei ta no ri sehai.

⁹A saninhringna chu ama chituhai nâia khan a om ngêt ngêt ngai a ni; Kin rama hin roiinpuina a om theina hrangin.

¹⁰Lungkhamna le thutak an irtonga; Felna le irngeina an irtuma.

¹¹Thutak chu milei ata a hong inchor suaka; Felna khan irvân ata a zuang vâr tâka.

¹²A ni, RENGPA khan thil sa pêk a ta; Kin ram hin a thil mông chu pe sa a ti.

¹³Felna chu a mâ hruai a ta, A hnunghai chu lampuia siam a ti.