Read Hrangkhol INPÂKNA HLAHAI 88 Bible Online

INPÂKNA HLAHAI 88 - Hrangkhol bible

INPÂKNA HLAHAI 88

¹O RENGPA, ni saninhringtu Pathian, A sûn a zânin ni makunga nang kin sam ngaia:

²Ki chongchaina hi ni makunga lût sianlân; Nang kin samna irhâia hin ni mikuar zuang do ro:

³Ki hringna hi lunginzînghaiin a sipa, Ki hringna hin Seol chu a hong nâi tâka.

⁴Khurpadopa chumhai laia tep sa ki nia; Hrâtna rêng rêng nei loi mi ang ki ni:

⁵Râl thathai thâna irmuhai anga Mithi laia paithâk ki ni; Khahai kha chu inhre ta mak che, Ni kut ata irhmangtir an ni.

⁶Khurpadop irhnuai taka ni nin zâltir tâka; Hmun inthim tak, inthûk takhaia khan.

⁷Ni ninginmurna khan a ni del tâka, Nangin ni tui irsôn murdi’n a nin tâktir tâka.

⁸Ki hmêl hriathai chu ni hla vitin nin omtira; An ta hrangin intirom taka ni ni siam tâka: Khârkhakin ki oma, ki isuak thei ta loi a ni.

⁹Intakna sikin ki mit a siat tîr tîr tâka: O RENGPA, a nî tin nang ki koia, Nangma tiang ki kuthai ki phara.

¹⁰Mithihai hrangin sinirkhêl ni itho hrang ma ni? A thi tâkhai khan thoiin nang an inpâk hrang ma ni?

¹¹Ni lungkhamzia chu thâna inhriattirin, Ni iamomzia chu irhmangna hmuna inhriattirin a iom hrang ma ni?

¹²Ni sintho’rkhêl thohai kha inthima inhriatin a iom hrang ma ni? Ni felna chu irnghilna rama inhriatin a iom sa hrang ma ni?

¹³O RENGPA, keima’n nang kin sama, Ki chongchaina khan zînga nang nghâk a ti.

¹⁴RENGPA, ithoa mo ki hringna hi ni ipaithâk mo? Ithoa mo keima tiang hin ni hmâi ni ithup?

¹⁵Ki nâipangte ata intak tuang le thi vâng vângin ki om ngai; Ni thil irkhêl takhai ki tuangin ki’rnaka a ni chel ngai.

¹⁶A satêna ni ningmurna khan a ni dea; Ni thil irkhêl takhai khan a nir hmangtir tâka.

¹⁷Kha khan sûn sôtin tui angin a ni vêla; A nir hual vêla.

¹⁸Lung ni thungtu le ki rual kha hlataka nin omtira, Ki hmêl hriathai chu inthima nin omtir sa tâka.