Read Hrangkhol INPÂKNA HLAHAI 89 Bible Online

INPÂKNA HLAHAI 89 - Hrangkhol bible

INPÂKNA HLAHAI 89

¹RENGPA lungkhamna thuhai chu kumkhua’n hla’n sak ki ta: Ki bâiin ni iamomzia chu irlo tin tin dênin inhriattir ki ti,

²“Lungkhamna chu kumkhua hrangin isinin om a ta; Ni iamomna chu irvânhaia ngei khin indettir ni ti,” ki ti tâk a ni.

³Ki mi inthang kuanga khan thu ki thunga, Ki siahlo Davida kuanga khomâk ki sâm tâka;

⁴“Ni’rchihai chu kumkhua hrangin indettir ki ta, Ni rêngtoihmun khom irlo tin tin dênin inding mai ki ti,” tiin.

⁵O RENGPA, irvânhai khin ni sinirkhêl tho hi inpâk an ta; Mi irthianghai inkhômnaa khin ni iamomna hi inpâk sa an ti.

⁶Irvân dumhai khin RENGPA kuang chongirkhek thei tu mo om ni? Mi sinthotheitak nâihai laia khin RENGPA ang,

⁷Mi irthianghai chong irkhômnaa Pathian ichiom tak, A kôl vêla mi murdi nêka chi ual tak hrang chu, tu mo om hrang?

⁸O RENGPA sipaihai Pathian, O RENGPA nangma anga mi hrât tu mo an om? Ni iamomna chu ni kôl vêla a om.

⁹Nang chu tuikhanglian lârirpâkna chunga roi ni rêl ngaia: A tui irsôn irsok laihai kha nin boitir ngai.

¹⁰Nangma’n chu Rahab chu râl ithat angin nin khoi chita; Nangma doituhai chu ni bân irnak hrâtin nin thekindarh tâka.

¹¹Irvânhai khi nangma ta a nia, irnêng khom hi nangma ta a ni: Rammual le a sûnga thil om murdi hi nangma inding a ni.

¹²Sim le hmâr chu nangma isiam a nia: Tabor le Hermon chu nir hming sikin raifânin an zâi ngai.

¹³Nang chu bân sinthotheitak ni nia: Ni kut kha a hrâta, ni kut chang tiang chu chôiindômin a oma.

¹⁴Felna le roirêlna fel chu ni rêngtoihmun irnghatsan a nia: Lungkhamna le thutak chu ni makunga an fe ngai.

¹⁵Irhâi raifânom inhre ngai nam chu an vân a sa e: O RENGPA, anni chu ni hmêl vâra an om ngaia: Ni felna sikin chôiindômin an om ngai.

¹⁶Nangma sikin sûn misa tâkin an om ngaia, Ni felna sikin nang an inpâk ngai.

¹⁷Nang chu an hrâtna roiinpuina ni nia: Ni ikanbîkna sikin chôiindômin kin om ngai.

¹⁸Kin phô hi RENGPA ta a nia; Kin rêng hi Israelhai Mi Irthiang ta a ni.

¹⁹Kha zoro lai khan ni mi irthianghai kuang inlârnaa thu nin sîra, “Mi inkhat hrât tak puma khan changpuina ki’rnghata; Mi inkhat, mihai laia inthang suak chu ki chôiindôm tâka.

²⁰Ki siahlo Davida chu ki hrûta: Ki sahriak irthiang khan ama chu ki pol tâka:

²¹Ki kut hi a kuanga indetin om a ta; Ki bân hin ama kha inhrâttir a ti.

²²Râl khan ngam no nia; Mi sual khan irhniam viat no ni.

²³Ama doituhai chu a makunga zêm inrîl ki ta, Ama khôkmâktuhai kha soisak ki ti.

²⁴Ama kuanga khan ki iamomna le ki lungkhamna kha om ta a ta; Ki’rhming sikin chôiindômin om a ti.

²⁵A kut chu tuikhangliana khan irnghat ki ta, A kut chang tiang tuidunghaia khan.

²⁶Ama khan, ‘Nang chu ka Pa, ki Pathian, ki saninhringna lungpui ni ni,” tiin nin sam a ti.

²⁷Khan, keiin ama kha nâilutîra siam ki ta, Irnêng rênghai laia anchungtaka siam ki ti.

²⁸Ki lungkhamna kha kumkhua’n ama hrangin vong insa ki ta, Ki thuthung chu a kuang om indet a ti.

²⁹A chi thâkhai kha kumkhua’n inomtir ki ta, A rêngtoihmun chu irvân om sûng ni dênin inomtir sa ki ti.

³⁰A nâihai khan ki dân hi an irheisana, Ki roirêlnahai angin om mahaia,

³¹Ki thu’nkung an porinchetira, Ki thupêkhai an vong insa no’n chu,

³²An tho’nchâinahai chu khianghrolin zuang kan ki ta, An pualoinahai kha zêmin zuang kan ki ti.

³³Khannisianlân, ki lungkhamna kha a kuang ata lapai pe zit no ninga, Ki iamomna kha milaka inchang phal viat no ning.

³⁴Ki thuthung chu porinchetir no ninga, Ki hmûra thu suak chu indanglamtir viat no ning.

³⁵Voikhat ki irthiangnaa sâlin khomâk ki sâma; Davida kuang milak insîr no ning.

³⁶A’rchi thâkhai kha kumkhua’n om an ta, A rêngtoihmun kha ki makunga misa angin om sa a ti.

³⁷Tha angin kumkhua hrangin indetin om a ta, Irvân duma inhretu iamom ang khin,” ni tia.

³⁸Khannisianlân nangin chu hnôl nuam mak chea, Ni sahriak ipol chunga khan ni ning an mur tâka.

³⁹Ni siahlo thuthung chu nin tira: A rênglukhum chu irnênga paithâk rakin nir hniamtir tâka.

⁴⁰A dâi murdi chu nin siata; A kulpuihai chu nin siat tâka.

⁴¹Lampuia fe murdi’n a thil an lâkpai pe ngai: A kôl vêla mihai hrilsiatin a om tâka.

⁴²Ama doituhai kut chang tiang ni chôiindôma; A râl murdi chu an râi nin fântir tâka.

⁴³A ni, a khandai bê chu nin môltira, Ama chu irbeinaa khan inding indettir ta mak chea.

⁴⁴A vârna kha nin boipai pea, A rêngtoihmun chu irnênga ni paithâk tâka.

⁴⁵A ruathar lai nikhuahai chu nin bong pea; Ama chu mualinphoina’n nir khû tâka.

⁴⁶O RENGPA, ni irbîk kumkhua hrang ma ni? Idôr ten mo ni ningmur chu mei angin a ichok hrang?

⁴⁷O, ki zoro hi a ibong hrang inhre maiin lân; Mihriam nâihai murdi hi ite ni loia ni isiam hi!

⁴⁸I ang mi mo thi nî hmêl hmu loia hring, Seol kut ata a hringna saninzôk hrang chu?

⁴⁹RENGPA, ni tianlai lungkhamna, ni iamomnaa Davida kuang khomâksâma ni inkunghai kha, Khôn mo a om tâk?

⁵⁰RENGPA, ni siahlohai an ihrilinsiatna inhre mai ro; Nam hrât takhai murdi hrilsiatna ki rôpsuama ki ituang ngaizia hi;

⁵¹O RENGPA, nangma doituhai hrilsiatna, Ni sahriak pol hnunghai hrilsiatna chu.

⁵²RENGPA chu kumkhua’n inpâkin om ri se. Amen, Amen.