Read Hrangkhol INPÂKNA HLAHAI 9 Bible Online

INPÂKNA HLAHAI 9 - Hrangkhol bible

INPÂKNA HLAHAI 9

¹RENGPA kuang khan ki milung murdi’n lômthu insîr ki ti; Ni sinirkhêl tho murdi chu hril ki ti.

²Nangmaa khan lômin ki râiinfân ki ti: O, nang Anchungtak, nir hming inpâkin zâi ki ti.

³Nangma ni zuang inlârin chu ki râlhai khom lâizâm an tho ngaia; Ni makunga chu tûkin an irhmang ngai.

⁴Ki ta hranga irhoi le ki thua hin ni ni thop ngaia; Fel taka roirêlin rêngtoihmuna khan ni toia.

⁵Nam tin ni halirchua, mi siahai ni’rhmangtira, An irhming chu kumkhontuanga hrangin ni kâtpai tâka.

⁶Kumkhontuanga hrangin kin râlhai chu an irhmang zoi tâka; An khopuihai kha nangma’n nin simpai tâka, Irnghil pharin an om tâk a ni.

⁷RENGPA chu kumkhua hrangin rênga a toia: A rêngtoihmun chu roirêlna hrangin a siam insa ta.

⁸Ama khan rammual hi fel takin roirêl pe a ta, Theibîk nei loiin mitin roirêl pe a ti.

⁹Khanchu RENGPA chu hnuaisiana tuangtuhai hrangin chu kulpui irsâng lei ni a ti, Lunginzîng zorohaia chu kulpui irsâng lei ni a ti,

¹⁰Khanchu nir hming inhretuhai chu nang iam an ti; Nangin chu, RENGPA, nang a zongtuhai chu rotsan ngai mak che.

¹¹RENGPA, Zion-a om chu, inpâkin zâi unglân; Mi tinhai laia a sinthohai kha hril roi.

¹²Pathianin dengthei tuanghai kha an hriat maia; An ichap irhâi irnghil ngai mah. Ama khan mi nunsiahai chu deng an theitir ngai.

¹³O RENGPA, lung nin khamin lân; Thina mikot ata ni kaisuak ngaitu, A ni khôkmâkhai sika ki denginthei tuang hi en ta;

¹⁴Nangma inpâkna murdi chu kin hriattir theina hrangin; Zion nâinu mikothaia chu, Ni ni saninhringna hin râiinfân ki ti.

¹⁵Nam tin chu an khurpadop siama khan tâk an ti: Inrûka an lên dâpa khan anni ke ngei an ôk tâka.

¹⁶RENGPA khan an hriattira, roi a rêl tâka. Mi sia chu ama kut suak ngeia khan an ôk ngaia.

¹⁷Mi siahai chu Seol-ah kîr nôk an ti, Nam tin Pathian irnghil ngai murdihai chu.

¹⁸Inriang invâihai chu irnghilin om mai no nihaia, Inrianghai sabeina chu kumkhua’n boi no ni.

¹⁹O RENGPA, thoi ta; mihriam ma maiin nang ngam no ri se. Nam tin chu ni mit hmua hin roirêl pe’n om ri se.

²⁰O RENGPA, anni chu inchitirin lân; Nam tinin mihriam mai an nih ti inhre ri sehai.