Read Hrangkhol INPÂKNA HLAHAI 90 Bible Online

INPÂKNA HLAHAI 90 - Hrangkhol bible

INPÂKNA HLAHAI 90

¹RENGPA, nang chu irlo tin tin dêna Kin omna ni ni ngai.

²Tânghai om mâna, Irnêng le rammual nin ding mân khom khan, Kumtuang ata kumtuang dên khomin nang chu Pathian ni ni.

³Nangma’n chu mihriam hi irhmangnaa nin fetir ngaia; “Mihriam nâihaio, kîr nôk roi,” ni ti ngai.

⁴Nangma irngaiin chu kum sângkhat hi sûn khat ang a nia; Mizân theng tâk ang kha a nia, Zân dârkâr tôite ang kha a ni.

⁵Anni chu tui lian angin nin tânpaia; Anni chu irmang ang an nia; Zînga chu hloisûl inchor suak ang an ni.

⁶Zînga chu a hong indônin a hong incher suaka; Khohloi tiang chu a hong thêmin, a hong chuai ngai.

⁷Ni ninginmurnaa inboipaiin kin oma, Ni ninginmurnaa lunginzîngtirin kin om saa.

⁸Kin pualoinahai chu ni makunga ni siaa, Kin sual thupinrûkhai chu ni hmêl vâra ni sia tâka.

⁹Kin dam sûng nikhua murdi hi ni ninginmurnaa a boi ngaia: Kin dam sûng kumhai hi lômthu angin kin inmong ngai.

¹⁰Kin dam sûng kumhai chu kum sômsari a nia, Hrâtna sikin kum sômriat khom a ni theia; Khannisianlân a sôtna chu sinsôlna le chardongna chian a ni; A boi lata, keini khom kin vuang irhmang ngai a ni.

¹¹Tu’n mo ni ninginmurna sinthotheizia inhriata, Nangma chi hrangzia anga ni ninginmurna kha inhriata?

¹²Kin dam sûng nikhuahai tep hrang lam nir chutir ro, Vârna milung kin nei sa theina hrangin.

¹³O RENGPA, zuang kîr nôk ro; idôr ten mo ni ning ni inmurtir hrang? Ni siahlohai chung thua khan ni lungrîl irlêkin lân.

¹⁴O, zînga chu ni lungkhamna’n nin siptir ro; Kin dam sûngin kin râi a fânin kin lôm theina hrangin.

¹⁵Nangin deng ni nin theitir ni le, Thil saloi kin tong kum sûng zoro anghai khan nin lômtir roh.

¹⁶Ni sintho chu ni siahlohai kuang inlang sianlân, Ni roiinpuina chu an nâihai kuang inlang ri se.

¹⁷Khan, RENGPA kin Pathian satna chu kin chunga om ri se: Kin kut sintho hi kin chunga indettir sa ro; A ni, kin kut sintho hi indettir roh.