Read Hrangkhol INPÂKNA HLAHAI 92 Bible Online

INPÂKNA HLAHAI 92 - Hrangkhol bible

INPÂKNA HLAHAI 92

¹RENGPA kuang lômthu insîr le, O Anchungtak, nir hming inpâka zâi hi thil satak a nia:

²Thil tum thei hrui sôm neihai, perkhuang hai, serânda irhâi beiindong thei haia, Zînga ni lungkhamna inlangtir le, Zân tin ni iamomna inlangtir hi thil satak a ni.

⁴RENGPA, nang chu ni sintho’n a nin lômtira: Ni kut sinthohai sikin raifânin zâi ki ti.

⁵O RENGPA, ni sinthohai chu a roiinpui bâka! Ni ngaituanahai chu an thûk tak tak a ni.

⁶Mi môlin chu hi hi inhre maka; Mi’nvêtin inhre sa thei mah.

⁷Mi siahai hloisûl anga an hong inchora, Thil tho’nsualtuhai murdi an hong thoi hlut hluta hin, Kumkhua hranga irhmangtirin an iom hrang a lei ni hen, ti hi:

⁸O RENGPA, nang chu kumkhua hrangin irsâng taka om chian ni ni.

⁹O RENGPA, irngai ta, nangma doituhai hi, Irngai ta, nangma doituhai hi an irhmang hrang a ni; Thil tho’nsualtuhai murdi hi indarin om zit an ti.

¹⁰Khannisianlân ki’rkî hi selepa irkî angin ni chôiindôma: Sahriak thara pol ki ni ta.

¹¹Ki mitin ki râlhai chunga ki inuamlam ten chu a hmu tâka, Ki bengin thil saloi thotu ni hong beituhai chunga ki inuamlam tung irhâi chu an hriat ta.

¹²Mi fel chu tûm angin hong irsôn hlut hlut a ta: Lebanon tânga sidar thing angin irsôn duak duak a ti.

¹³RENGPA ina phunhai chu kin Pathian biak in hualsûng kholâia khan irsôn hlut hlut an ti.

¹⁴Tar hnunga khom la ra mai an ta; Tui pom ngitin hring mur an ti:

¹⁵RENGPA chu mi diktak a nih ti inlangtirna hrangin; Ama kha ki lungpui a nia, amaa khan felloina rêng rêng om mah.