Read Hrangkhol INPÂKNA HLAHAI 94 Bible Online

INPÂKNA HLAHAI 94 - Hrangkhol bible

INPÂKNA HLAHAI 94

¹O RENGPA, nang phuba lâkna ircham neitu Pathian, Nang phuba lâkna ircham neitu Pathian vâr suak roh.

²Nang irnênga roirêltu, sinin lân: Lârirpâkhai chu an sual man thuan roh.

³RENGPA, mi siahai khan i dôr ten mo, Mi siahai khan i dôr ten mo an ingam hrang?

⁴Anni chu an chong pai paia, hmâitâi takin thu an insîra: Thil tho’nsualtuhai murdi chu an irpâk irhlôm ngai.

⁵O RENGPA, ni mihai chu an irnôitira, Ni mihai chu deng an intheitir ngai.

⁶Meithâi le mikhual chu an thata, Pa nei loi chu an that ngai.

⁷“RENGPA’N hmu no nia, Jakoba-hai Pathianin irngaitua ual no ni,” an iti ngai a ni.

⁸Mi laia mi môlhaio, irngaitua roi: Mi’nvêthaio, itika mo nin ivâr hrang tâk?

⁹Mikuar inkhoptu khan a inhriat loi hrang ma ni? Mit siamtu khan a ihmu loi hrang ma ni?

¹⁰Nam tin iseptu’n a ihalirchu loi hrang ma ni? Mihriam vârna irchutirtu khan?

¹¹RENGPA khan mihriam ngaituahai chu ite ni loi mai mai a nih ti an hriat.

¹²RENGPA ni sepna ni dân ni irchutirhai chu an vânnei e!

¹³Mi sualhai tâkna hrang sirhup choi zoi mâka chu, Lungzîng nia sôl ni’rngamtir hrang a ni.

¹⁴RENGPA khan a mihai a ipaithâk hrang ni ma, A dongtum chu a irotsan hrang ni mah.

¹⁵Roirêlna chu felna tiang kîr nôk a ti: Milung diktak irput murdi khan kha kha zui an ti.

¹⁶Tu mo thil saloi thotuhai ni sabei pe hrangin thoi hrang? Tu mo thil tho’nsualtuhai ni sabei pe hrangin ngîr hrang?

¹⁷RENGPA chu ni changpuitu ni no sianlân chu, Ki hringna hi inrang takin hmun infiara a iom hrang a ni.

¹⁸“Ki kesir a châi,” ki ti’n, O RENGPA, ni lungkhamna khan ni ni kaia.

¹⁹Ki lungrîla ngaitua tamtak ki nei lai khan ni irtharngamnahai khan ki hringna hi an lômtir ngai.

²⁰Pualoina rêngtoihmun, dâna thil tho’nsualna siam ngaia khan, Irpolna nang a inei ma ni?

²¹Mi fel hringna bei tumin an pungkhôm ngaia, Thisen sêlnaboi chu thiamno an changtir sa ngai.

²²Khannisianlân RENGPA chu ki kulpui irsâng a lei nia; Ki Pathian chu ki zôkna lungpui a lei ni.

²³Ama khan anni sualna ngei kha an chunga an chumtira, Anni satloina ngeia khan irhmangtir a ta; RENGPA ei Pathian khan irhmangtir a ti.