Read Hrangkhol INPÂKNA HLAHAI 95 Bible Online

INPÂKNA HLAHAI 95 - Hrangkhol bible

INPÂKNA HLAHAI 95

¹O hong roi, RENGPA chôiindômin raifân takin zâi ei ti. Ei saninhringna lungpui chôiindômin raifân takin khêk ei ti.

²Lômthu insîrin a makunga fe ei ti, Inpâkna hla saka ama chôiindômin raifân takin irhâi insua ei ti.

³RENGPA chu Pathian roiinpui tak a nia, Pathian murdi chunga Reng roiinpui tak a ni.

⁴Ama kuta khan irnêng hmun inthûk takhai chu a oma; Tâng sîp irsâng takhai chu a ta a ni sa.

⁵Tuikhanglian hi a ta a ni, ama isiam a nia; Mual khom hi a kut suak a ni.

⁶O hong unglân, chubai mûkin kûn ei ti; RENGPA ni Siamtu makunga khûksadel ei ti:

⁷Ama chu ei Pathian a nia, Eini hi a sa vâina hmuna mi le, a kuta belrahai ei ni. A vuan hin ar hâi chu lei inhre ta unglân chu o!

⁸Meriba-ah an itho ang khan nin milung inngartir no roi, Ramchâra Masa nikhua ang khan:

⁹Kha zoro lai khan nin irchibulhai khan an nin thêma, Anni fiaa, ki sintho chu an hmua.

¹⁰Kum sômminli sûng dên kha mi irchihai chunga khan ki milung ni mah, “An milunga irngaiinsual hmang mi an nia, Ki lampuihai khom inhre mahai,” ki tia:

¹¹Khasikin, “Ki irngamnia khan lût no nihai,” tiin. Ningmurin khomâk ki sâm tâka.