Read Hrangkhol INPÂKNA HLAHAI 96 Bible Online

INPÂKNA HLAHAI 96 - Hrangkhol bible

INPÂKNA HLAHAI 96

¹O, RENGPA chôiindômin hla thar sak unglân: Irnêng lua murdihaio,

²RENGPA chôiindôma hla sakin, ar hming inpâk unglân; A nitin a saninhringna thu chu inhriattir roi.

³Nam tin laia a roiinpuizia hril unglân, Mi tinrênghai laia a sinirkhêl thohai kha hril roi.

⁴RENGPA kha a roiinpuia, a satêna inpâk hrang a ni: Pathian murdi nêka chi rua a ni.

⁵Mipuihai pathianhai chu millimhai an nia, RENGPA chu irvânhai khi a isiam a ni.

⁶Chôiindômna le roiinpuina a makunga an oma: Hrâtna le satna chu a hmun irthianga an om.

⁷Mi tina chi tinrênghaio, RENGPA chu pe unglân, RENGPA chu roiinpuina le hrâtna pe roi.

⁸RENGPA chu ar hming roiinpuina chu pe unglân: Thil inhlan hrang chôiin a biak in hualsûng mikothaia khan hong roi.

⁹O, irthiang satna irbelin RENGPA chu chubai mûk unglân: Irnêng lua murdihaio, a makunga chi pumin kûn roi.

¹⁰Nam tin laia khan, “RENGPA chu rênga a toi,” ti roi: Rammual khom hi an hnîng theiloina hrangin, indettirin a oma: Ama chu theibîk nei loiin mi tin roi kha rêl a ti.

¹¹Irvânhai khi lôm takin om sianlân, irnêng khom hi raifân takin om ri se; Tuikhanglian le a sûnga thil om murdi hi inri dur dur ri se;

¹²Loi le a sûnga om murdi hi lôm takin om ri se: Kha tika chu ram hnuaia thing murdi hi raifânin zâi an ti.

¹³RENGPA makunga khan: ama chu a izuang hrang a ni; Irnênga roirêl hrangin a izuang hrang a nia: Rammual hi fel takin roi rêl pe a ta, Mi tinhai chu a thu takin roi rêl pe sa a ti.