Read Hrangkhol THUVÂRHAI 10 Bible Online

THUVÂRHAI 10 - Hrangkhol bible

THUVÂRHAI 10

¹Solomona thuvârhai: Nâipa vârin a pa lômna hrang a siama; nâipa intô rêkin chu a nu beidongna an tungtir ngai.

²Dik loitaka irchon ni ibûm khan nang siam insa no nia, dikna rêkin chu thina ata a hringna a sansuak ngai.

³RENGPA khan mi sahai chu phîngchâm an tuang hrang phal no nia, mi pualoihai chu an inuam inthang an hmu loina hrangin khâipaihai a ti.

⁴Thaboina khan inriangin nang siam a ta, takirtâina rêkin chu nang irchongtir a ti.

⁵Mi vâr khan bôlzoi laiin bu a buk khôm ngaia; bukkhôm zoroa zâlthangdâr tho chu mualinphoina a ni.

⁶Mi sain chu satvurna dong a ti. Mi pualoi chong chu nunrôngna a kop sa ngai.

⁷Mi sahai inhriat maina chu satvurna ni a ta, mi siahai irhming rêk chu irnghilin om zôi zel a ti.

⁸Inhriatna nei mihai khan irchutirna sa an dong ngai. Mi’nto chong tam rêk chu irhmang an ti.

⁹Mi dikhai chu an zôk diai ngaia, mi dikloihai chu ichelin om an ti.

¹⁰Tukhom thudik thuptuhaiin buaina an tungtira, tukhom irchong taka sêltu chu irngeina siam a ni.

¹¹Mi dik chongbâi sa chu hringna hnâr an nia, mi pualoi chongbâi chu nunrôngna isip a ni.

¹²Hnôlna khan buaina an suaktira, lungthungna chu tho’nsualna murdi a’rkhupai ngai.

¹³Mi vârhaiin omzia omin an chonga, mi’ntohai rêk chu hrem an inang a ni:

¹⁴Mi vârhai khan inhriatna an buk khôma, mi’nto a chongin chu buaina a kêlsua ngai a ni.

¹⁵Irchon hi irchonghai ngîrsuakna a nia, inrianghai irhmangna chu an inriangna hi a ni.

¹⁶Sin sa lômman chu hringna a nia, sualna rêkin chu sual ualna tiang a hruai ngai.

¹⁷Hrilna pomtuhai kai hring an ta, mâni sualna pom nuam loihai chu an tho’nchâi mai ngai.

¹⁸Mi a hmumâkna thuptu chu milak a nia; mi insîrinsiat ngaitu rêk chu mi’nto a ni.

¹⁹Mi a chong tam dôr a chong insual ngai. Mi vârin chu a dâihrek ngai.

²⁰Mi sa chonghai chu tangkarua satak ang kha a nia; mi pualoi ngaituana chu teproboi a ni.

²¹Mi sa chonghai khan mi tamtak a siam insatir ngaia, invêtna rêkin chu mâni thina an tungtir ngai.

²²RENGPA satvurna khan ar chongtir ngai. Sin hrâtna ringotin irchongtir thei ual no ni.

²³Thil sual sina raiinfân hi intô sin a ni. Mi bengvârhai lômna chu mi an lômtir ngai.

²⁴Mi felhai chu an thil nuam inthanghai an hmu ngaia, mi siahai rêk chu an ichi tak kha an chunga tung a ti.

²⁵Sim phâivua a hong thoa, mi siahai kha a sêm irhmangtira, mi dikhai chu an zôk thei ngai.

²⁶Hâ hranga uain thûr le mit hranga meikhu angin mi thaboi chu a tîrtu hrangin ni a ti.

²⁷RENGPA chitna khan hring sôt an ta; mi siahai rêk chu an zoro chuk mân an thi ngai.

²⁸Mi sahai tûngna chu lômna tiang a pana, mi siahai maton rêk chu irhmangna a ni.

²⁹RENGPA khan mi dikhai chu a hrung ngaia; thil sual sinhai chu ar hmangtir ngai.

³⁰Mi felhai chu indetin om mai an ta, mi siahai chu irnêng chunga hin hoitakin om no nihai.

³¹Mi felhai bâia khan vârna thu a hril suak ngaia; milei, siatna ngai chu tanpaiin om a ti.

³²Mi felhaiin chu ipom thei thu hril hrang an inhriata, mi siahaiin chu mi milung siatna hrang vai an hril ngai.