Read Hrangkhol THUVÂRHAI 13 Bible Online

THUVÂRHAI 13 - Hrangkhol bible

THUVÂRHAI 13

¹Nâipa vârin chu a pa irchutirna ar ngaitua ngaia, mi hmusit uar mi’n chu irchutirna irngaitua ngai mah.

²Mi sahai chu an chongbâi suakin lômman dong an ta, milak ngaihai chu nunsiatna inlêngtir vai an inuam a ni.

³A bâi vêng insa murdi’n a hringna a ivêng insa a ni. Chong irdîn loi chu a binga irhmangna ni a ti.

⁴Mi thaboiin thil tamtak irzuk khom sianlân, hmu viat no ni. Mi takirtâiin chu a izong murdi hmu a ti.

⁵Mi dikhai khan milak an khôkmâka, mi siahai chong chu inzakna le mualinphoina a ni.

⁶Felna khan dik taka omhai chu a vêng insa ngaia, Sualna chu mi sual irhmangna a ni.

⁷Mi senkhat chu ite nei loiin irchong om an thoa; senkhat nôk rêk chu irchong chaka inriang om tho an om.

⁸Mi irchongin a hringna irtanna chu ar chon a nia, mi’nriang rêk chu tûte’n irkôk ngai mahai.

⁹Mi felhai chu vâr irtêk tak ang kha an nia, mi siahai chu meiser thi chian ang kha an ni.

¹⁰Lârirpâkna khan chu irkhalna vai a kêlsua ngai. Irchutirna dong nuam mi kuang chu vârna a om.

¹¹Ol tenga irchon ni ibuk chu chiam zôi zel a ta; dengthei taka ni ibuk chu hong pung ual ual a ti.

¹²Sabeina a dongin chu lungrîl an natira, lunginchong a taka hong tung chu hringna thing a ni.

¹³Irchutirna sa hnung songsan ka chu buaina tong an ta; thupêk chi ka chu lômna pêk thei ni a ti.

¹⁴Mi vârhai irchutirna chu hringna hnâr a nia; hmun ichioma hringna inzôkna hrangin changpui a ti.

¹⁵Mi bengvârhaiin mahrip an hloa, tûng roboi mihai chu ramna lampuia an om ngai.

¹⁶Inhriatna nei mihai chu an sin mân an ngaitua bak ngaia, intôhai chu invêtna an thanginzar ngai.

¹⁷Palai pualoiin buaina an suaktir ngaia, palai iamom rêkin chu irngeina an tungtir ngai.

¹⁸Tukhom irchutirna dong nuam loi chu a chunga inriangna le mualphoina tung a ti. Irchutirna irngaitu chu chôiirsângin om a ti.

¹⁹Lungdo tak tuanintunga a hong omin chu, lungrîl hrangin a thum tak a ni. intohai hrangin chu sualna hnung songsan kha thil intirom tak a ni.

²⁰Mi vâr irpôlpuiin lân vâr ni ti. Intô irpôlpui chu dengthei tuangna a ni.

²¹Mi sualhai chu kho hmun khoma buaina’n a zui mai ngaia, mi felhai rêk chu thil sain thuan ni an ti.

²²Mi sahaiin chu a tuhai ten irchon mâk pe hrang a nei ngaia, mi siahai irchon rêk chu mi fel kuta pêk ni a ti.

²³Ram thara khan inrianghai hrang fâk tamtak insua pehai a ta, khannisianlân roirêl dikloi mihai khan an loi nei hrang phal pe ngai mah.

²⁴Mi, a nâi sep nuam loi chu lung a ithung loi a nia, lung a thungin chu a sep ngai a ni.

²⁵Mi felhai chu an rukdôr fâk an neia, khannisian mi siahai chu irsamin khop ni nei no nihai.