Read Hrangkhol THUVÂRHAI 14 Bible Online

THUVÂRHAI 14 - Hrangkhol bible

THUVÂRHAI 14

¹Nupang vârin in an sin ngaia, nupang into’n chu ama kut ngeiin in a set ngai.

²Dikna neiin chu RENGPA chi mi a nih ti an langa; dikna nei loi chu RENGPA chi mi ni mah ti an lang ngai.

³Mi’nvêt chongin chu lârirpâkna khianghrol a oma, mi vâr chongin chu an zôk ngai.

⁴Sehrâtchal om loina sâ in chu a fâi ngaia, khannisianlân irlâpna tamtak pêktu chu sehrâtchal hrâtna sika a ni.

⁵Thu’nhriattu iamomna chu irkhêl ngai maka. thu’nhriat indik loiin chu minlak a hril ngai.

⁶Mi hmusit ngaihai chu itiklai khomin vârna hmu ngai maka, khannisian inhriat thiamna nei mihaiin chu vârna an hmu zôi zel ngai.

⁷Intô kuang ata irkêm ro; a kuang ata ite thil sa irchû hrang hmu no chi ni.

⁸Mi vârhai vârna bi chu an sintum an inhriatna hi a ni. Intohai into nasan chu inhriat an irtina hi a ni.

⁹Intohaiin chu an sual zoro’n poi ti mahaia, mi sahaiin chu ngaidam an zong ngai.

¹⁰Ni lômna chu ni ta a nia, ni ngaisiatna khom ni ta a ni. Tûte’n nang irkoppui thei no ni.

¹¹Mi siahai in a chim tena khom mi sahai in chu lan ding mai a ti.

¹²Mâni irngai ringota lam dik chu thina lam khom a ni lik thei ngai.

¹³Innuinaa khom ngaisiatna a om thei. Raifânna a hek tena chu beidongna a om mai ngai.

¹⁴Mi siahai chu an siat man hmu an ti. Mi sahai chu an sintho lam ang takin lômman ipêk ni an ti.

¹⁵Into’n chu chong murdi a iama; mi vârin chu a ke sir hrang a en bak ngai.

¹⁶Mi vârin chu buaina a lôina hrang a ngaitua ngaia, intohai rêk chu ngaitua loiin an pût zôi zel ngai.

¹⁷Milung hrâthai chu inmôl takin sin an tho ngaia; mi vârhai rêk chu milung dairiamin an om ngai.

¹⁸Intohai chu an into man an hmua, mi vârhai chu inhriatna inkhumtirin an om ngai.

¹⁹Mi sualhai chu mi felhai makunga kûnin, mi dikloi chu mi felhai kotbâia kûn an ti.

²⁰Mi’nriang chu a urêng a sûngsuak ngei khomin an hnôl ngaia, mi irchong rêk chu urêng tamtak a nei ngai.

²¹Vânsatna dong nuamin chu inriang lunginkham ri se; mi hmusit hi sualna a ni.

²²Sin sa sinin chu mi danghai mahrip le iamzoina a dong ngaia; thil sual sinin chu an tho’nchâi ngai.

²³Sin takirtâi hi inlâpna a nia; chanlamboi hrila toi chian chu inriangna a ni.

²⁴Mi vârhai lômna chu irchongna a nia, intohai rêk chu an intona vaia inhriat an ni.

²⁵Thu’nhrepuitu thudik insîrna’n mihai an zôk ngaia; milak a hrilin chu mihai a ihuang a ni.

²⁶RENGPA chitna khan tûngna lian tak a oma; a nâihai khan zôkna hmun an hmu ngai.

²⁷RENGPA chi chu hringna tuihnâr a nia; thina chânghai lôi theina a ni.

²⁸Mipui tamna khan chu rêng roiinpuina a oma; mipui tômna rêka chu rêng nâipa irhmangna a om.

²⁹Mi phûkdâi chu mi vâr tak a nia, milung hrât chu an tozia vai târinlang a ti.

³⁰Lungrîl damna chu taksa hrisêlna a nia, hnarsâna rêk hi chu ru hmon theina a ni.

³¹Mi’nriang sirphâna chu Pathian a siamtu êsêlna a nia; mi’nriang lunginkham rêk chu Pathian chôiindômna a ni.

³²Mi sia chu a sintho insual khan ama irhmangna hrang an tungtir ngaia, mi fel chu a felna khan hrung mai a ti.

³³Vârna chu mi bengvârhai ngaituanaa khan a om maia; intohaiin chu vârna ite inhre mahai.

³⁴Felna’n nam a chôiirsânga; sualna chu nam tin hrangin mualinphoina a ni.

³⁵Renghai ngaisakna chu tirtôn vârhai chunga a oma; ama philtuhai chunga chu a ningmurna a chum ngai.