Read Hrangkhol THUVÂRHAI 16 Bible Online

THUVÂRHAI 16 - Hrangkhol bible

THUVÂRHAI 16

¹Lungrîla lei ngaitua irfûk hi mihriam sintum a nia, sâmna rêk chu RENGPAA irthokin a ni.

²Mi, mâni irngaiin a itho murdi a dik a ti thei, khannisian Pathianin chu lungrîl tumna kêng a irkhî ngai.

³Ni ngaituanahai satvur hrangin RENGPA ngênin lân, khanchu ni ngaituanahai kha hlo chukin sin thei ni ti.

⁴RENGPA thilsiam murdi hi omzia nei inzen a nia; mi siahai khom sûn saloia hrang an ni.

⁵Lungrîla lârirpâk murdi chu RENGPA hranga intirom an ni; dengtheina tuang loiin insua no ni.

⁶Dikna le iamomna nei chu Pathianin a ngaidam ngaia. RENGPA chitna’n mi’n sual a mâk ngai.

⁷Mi, a omlamin RENGPA an lômtirin chu a râlhai khom rual sa’n a siam thei ngai.

⁸Dikloi taka lâklût intam nêkin chu dik taka hlo suak, tômte nei a sa ual.

⁹Mi, a lungrîla a sin hrang a ngaitua theia, kalchôi hrang lam chu RENGPA’N a zêk pe ngai.

¹⁰Reng khan Pathian irchamneina chang a ta; a roirêl tinrêng a dik ngai.

¹¹Vârna le irkhîna dik hi RENGPA nuamlam a nia; a ni, vârna tinrêng a idik hrang a ni.

¹²Pualoina hi rênghai hranga intirom a nia, felna hi rêngtoihmun detna a ni sikin.

¹³Thudik hi rêng lômna a nia; thudik hrilhai chu uksak a ti.

¹⁴Mi vâr khan rêng inlômtir tum a ta, rêng ningmurna chu thanginthei ang kha a ni.

¹⁵Reng hmêl vâra khan hringna a oma; a ngaisakna chu rua hnungkhôn thoa sûm ang kha a ni.

¹⁶Rângachak nêkin khom vârna nei hi a sa uala, a ni, tangka nêkin khom inhriat thiamna chu inthang ual hrang a ni.

¹⁷Mi sahai murdi’n sualna lampui hnung an songsan ngai; khasikin, a lampui fena vêng insa khan a hringna a inzôk a ni.

¹⁸Irpâkna’n chu irhmangna tiang a hruaia, irsongna’n irhmangna tiang a hruai ngai.

¹⁹Mi lârirpâkhai le râllâk thil irsem nêkin chu irngaiintôm taka inriang ni hi a sa ual.

²⁰Irchutirna irngai mi chu tuanintungna dong a ti. RENGPAA irnghat mi chu mi vânnei a ni.

²¹Mi vâr puihling chu a vârna’n mi’n inhria an ta; a chongbâi thum dôr mi an hnê ngai.

²²Mi vâr hrangin vârna kha hringna hnâr a nia; mi’nvêt irchutir tum chu chanlamboia zoro inhekna a ni.

²³Mi vârhai khan an chong mân an ngaitua baka; an itihai murdi’n lungrîl an hnê ngai.

²⁴Chong sa chu khuaihlutui ang dôr a ni. Hringna hrangin a thuma; takpum hranga hrisêlna a ni.

²⁵Mâni irngaia lam dik ni le irhoia inlang, khannisian a mongna chu thina khom a om.

²⁶Sintho mi khan a fâk hrang sikin sin a thoa, a phîngchâm khopna hrangin sin a tho ual ual ngai.

²⁷Mi siahai chu mi dang ningthik sinna hrang lam an zonga; an chongbâi suak chu mei ang kha a ni.

²⁸Mi pualoihai khan chong chanlamboi an hril indarh ngaia; irkhîk za zata buaina insua’n rual irchangna a’rsentir ngai.

²⁹Mi nunsiahaiin an rualhai an huanga; siatna tiang a hruai ngai.

³⁰An irkamnôia, nang inmitkhum mihai ata irdîn ro, a hmûr phong loi mi khan thil saloi an tungtir ngai.

³¹Hring dam sôtna hi mi fel lômman a nia; lu chuak hi an roiinpuina a ni.

³²Mi lungrîl ir-uai hi mi hrâthai nêkin a sa ual. Mâni lungrîl sep zoi hi khopui inhnê zoi nêkin a sa ual.

³³Mihriamin Pathian nuamlam inhriatna hrangin tâ an sân ngaia, khannisian a mongna chu RENGPA ta a ni.