Read Hrangkhol THUVÂRHAI 17 Bible Online

THUVÂRHAI 17 - Hrangkhol bible

THUVÂRHAI 17

¹Buaina sip ina hruaithe fâk nêkin chu irngei diala bu dâi tang nêk a sa ual.

²Suak vârin a pu nâipa chunga khan irchamneina nei a ta, irchon khom dongtum nei a ti.

³Rângachak le sumtak chu meiin a’rthîta, mihriam lungrîl rêk chu RENGPA’N a fia ngai.

⁴Mi dik loihaiin chu saloi tiang an mikuar an sunga, mi minlakhai khom milak tiang an mikuar an sung ngai.

⁵Mi’nrianghai hmusittu chu Pathian a siamtu a iêsêl a ni. Mi vânduaina inriamtu chu vîk tong loiin om no ni.

⁶Nâipanghai roiinpuina chu pahai hi an nia, putarhai rênglukhum chu an tu le tehai an ni.

⁷Mi mahriphaiin milak hril ngai maka, intohai rêkin chu thu poimo insîr hrang nei ngai mahai.

⁸Mi senkhat irngai dânin chu fâk inrûk hi, dôi angin sin a thotheia; thil tinrêng a tho thei hrangin an iam ngai.

⁹Mi tho’nsualna ngaidamtu chu lungirthungna a izong a ni. Mi tho’nsual inhriat maina khan rual irchangna a sen ngai.

¹⁰Into’n voi irzakhat vîka a irchû nêkin mi vârin voikhat irchutirnaa a irchû a tam ual ngai.

¹¹Mi sia, buaina siam chian chian ngaihai chunga khan, thina kha palâi nunse tak tîr ni a ti.

¹²Into, invêt irtongpui nêkin chu, savompui a têhai la pe zoia irtongpui nuam a om ual.

¹³Satna, suala thuan nôk ngaitu chu thil saloiin a in mâksan no ni.

¹⁴Irkhal irphutna chu tuitial chet ang kha a nia; khasikin irngo irzêm an tungtir mân irngamtir tum ro.

¹⁵Mi sual thiam changtu le mi sa thiam no inchangtirtu chu an ruaiin RENGPA hranga intirom an ni.

¹⁶Intô thiamna neina hranga sum inthâm hi ite ar fêna om ma, mânia inhriatna a nei no sikin.

¹⁷Rual sain chu itiklai khom lungthungna an langtir ngai. Irzirpui hi chardong nia hmang hranga suak a ni.

¹⁸Inhriatna nei loi mi vai kêng mi dang lâkai chunga mophurtu hranga chonginkung ngai.

¹⁹Sualna irngaiinna miin chu buaina a’rngaiinna a ni. A neina song zo zôi miin chu buaina a izong a ni.

²⁰Tukhom thil saloi ngaitua ngai le insîr ngaiin chu thil sa hmu ngai maka, siatna vai a ihmu a ni.

²¹Nâipa invêtin chu a pa hrang lungdûkna a ni. Nâipa intô neitu pa chu lômna nei ngai ma.

²²Lungrîl irthafânna hi damna satak a nia; lungrîl ngûina’n chu ru an chârtir ngai.

²³Roirêltu dik loiin dâihrekin fâk inrûk an lâka, khanchu roirêlna dik hmang nuam ngai ma.

²⁴Mi vârin chu vârna tiang a’rnghat ngita, intô rêk chu kil tin an khîk têituai ngai.

²⁵Nâipa intô chu a pa beidongna intungtirtu a nia; a nu hrangin irsîrna an tungtir ngai.

²⁶Mi felhai intuangtir sa ma; mi sahai tôkhmol fâk an omin chu rêl indikna a iom loi a ni.

²⁷Inhriatna nei miin chu a chong ar dîn ngai. Milung ir-ial taka om mi khan inhriat thiamna a nei.

²⁸Intô khom a dâihrekin chu mi vâra tep sa a nia; a chong intômin chu mi lunginchong neiin ibe thei a ni.