Read Hrangkhol THUVÂRHAI 18 Bible Online

THUVÂRHAI 18 - Hrangkhol bible

THUVÂRHAI 18

¹Mi, mâni ringota om nuam chu mâni hrang vaia sa an hriat ngaia; mi murdi’n thudik an iti kha pom ngai ma.

²Into’n chu inhriat thiamna a nei le nei loi ngaisak ngai maka; mi’n mi vâr ni ti ri sehai tia a lungrîla om insîr vai kêng a inuam ngai.

³Sualna a hongin chu hmusitna khom a honga, inzakna chu mualinphoina le tongna a ni.

⁴Mi, a bâia thu chu tui inthûk tak ang kha, vârna tuihnâr luang ang kha a ni.

⁵Mi sual thop chu sa ma. Roirêlnaa mi fel hnôl khom sa ma.

⁶Into’n irkhalna a phutin chu tôkhmol a izong a ni.

⁷Intô a chongin chu ama irhmangna a nia; ama chongbâi suak chu ama irkhitna hranga châng a ni.

⁸Chong tufiam hi irngaihoi a oma, bu nêk irhnikin ei sûng a ibit mot mot ang hi a ni.

⁹A sin thoa mi thaboi chu mi irhmangtirtua irzirpuipa a ni.

¹⁰RENGPA chu kulpui det tak ang kha a nia, mi felhai an intân lûta an zôk ngai.

¹¹Irchonghaiin chu an irchongna khan khopui kulbang dettak angin a ihrung thei an sôn ngai.

¹²Tukhom a’rngaiintôm no’n chu chôiirsângin om ngai maka; mi irchonghai chu irhmangna lampuia an hrô ngai.

¹³Ni sâm mân irngaitua bak roh. khano’nchu invêt hlôna le mualinphoina ni a ti.

¹⁴La hring nuamna khan dam loi laiin intûk indet a ta, khannisianlân lungrîl a popin chu sabeina boi a ti.

¹⁵Itiklai khomin mi vârhai chu irchû an nuam mai ngaia; mi bengvârhaiin inhriatna an zong ngai.

¹⁶Mi lian hmu nuamtuhai chu thil pêkin lampui an hong pe ngai.

¹⁷Ama thiamna thu’nsîr masatu chu a’rdoipuitu’n an sîr nôk mâka chu a dik angin an lang ngai.

¹⁸Mi hrâthai an irkhalin chu tasânin thubuai kha an infel thei ngai.

¹⁹Ni’rzirpui sanin lân, ama khan kulpui det angin nang hrung a ti. Nir khalpuiin chu a in nang khâr pe a ti.

²⁰Mi, a chongbâi suak ra khan hring a ti.

²¹Ni chong khan hringna a sûnghual theia; ni chong dên khan hringna an siat irhmangtir thei. Khasikin ni chongna ra kha fa ngêt ni ti.

²²Dôngma hmu chu thil sa a ihmu a ni; RENGPA’N a ingaisakna a inlang a ni.

²³Mi’nriang a chongin chu mahrip takin a ngên ngaia, irchong rêkin chu inhrum khakin a sâm ngai.

²⁴Rual senkhat chu rual pai pai a oma, khannisianlân, rual senkhat chu mâni irzirpuihai nêka iamom ual an om.