Read Hrangkhol THUVÂRHAI 20 Bible Online

THUVÂRHAI 20 - Hrangkhol bible

THUVÂRHAI 20

¹Zu in hi nuizabûr mi siamtu a nia; zû’nrui hi invêtna a ni.

²Reng ningmur kha chi ro, kâmkeibaknei inhrûm ang kha a nia; a ninginmurtir chu mâni hringna chunga thil tho’nsual a ni ngai.

³Intôhaiin chu irhal an phut ngaia; anni lai ata irkêm hi irhming satna a ni.

⁴Sin mi irthaboi, a zoro taka irnêng tuk loi chu, bu ât zoro’n a kut dô a ta, ite nei no ni.

⁵Mihriam lungrîl ngaituana chu tuikhanglian inthûk taka tui ang kha a nia, khannisianlân inhriat thiamna nei murdi’n thangsua a ti.

⁶Mi tamtak iamom irti inzen ni an ta, khannisianlân, mi iamom tak tak nangma’n hmu’nfel tum roh.

⁷Mi fel, dikna nei mi nâihai chu râlvân sa an ni.

⁸Roirêlnaa rêngtoihmun khan a mitin thil saloihai murdi a khâipai ngai.

⁹“Ki lungrîl ki’rthiangtira, ki sual ata ki’rthiang tâk,” tu mo a ti thei hrang?

¹⁰RENGPA’N vârna le irkhîna dik loi hmang mihai chu a hnôl ngai.

¹¹Nâipangte lua a sinthoa khan a nina an langtir ngai; nâipang sa a ni le ni loi a sintho ata inhre thei a ni.

¹²Inhriatna mikuarhai le hmu theina mithai hi RENGPA ni ipêk se seng a ni.

¹³Irtha inboia zâlthangdârin ni zoro ni hmangin chu hong inriang ni ti. Sin tho’n lân fâk nêk irkhopin nei ni ti.

¹⁴Thil irchotu khan a man a hlu hrai a ti ngaia; khan a kîr nôk tenin chu a man a irhniamtira khan ar pâk nôk ngai.

¹⁵Ni insîr kha nin hriat infelin chu rângachak le lunghlu nêka thil hlu ual ni inei a ni.

¹⁶Intô khualmi lâkai chunga mophurna la hranga chonginkungtu chu, ama irchon khom bânda intung a ti.

¹⁷Dikloi taka ni ilâklût chu mihriamhai ta hrangin irzuk a oma, khannisian inhnunga chu lungtehret bâr ang kha ni nih ti.

¹⁸Thil tum ni nei mân irhril irsakna zong ro, irdoina ni siamin chu nang a hruai thei hrang mihriam sa zong ro.

¹⁹Chong tam mi’n chu thil irthup ip thei ngai ma; khasikin mi chong tam hrai irpâlpui loi a sa.

²⁰A nu mani, a pa mani, khua sâltu chu inthim irsakhak hnuaia meiser that rip angin a hringna mong a ti.

²¹Irchon hi a phuta ol tengin buk thei zel ni khom sianlân, inhnunga chu satvurna ni zit ual no ni.

²²“Sual chu lei thuan zôi zel rong” ti no ro. RENGPA nghâkin lân, ama’n indiktir ving a ti.

²³Inhriatna le vârna dik loi hi RENGPA mithmua intirom tak a ni.

²⁴Mihriam lampuihai chu RENGPA inkung a nia; itin mo mihriamin a hringna lampui a inhriat thei hrang?

²⁵Pathian kuang thil nin hlan mân ngaitua bak ro. Inhnunga nir sîr nôk itinin.

²⁶Reng vâr khan thil tho’nsualtu kha chel suak a ta, khonzâna boiin dengintheitir a ti.

²⁷Mihriam lungrîl ngaitua theina chu RENGPA meiser a nia, einia irthokin ite thup thei no ih.

²⁸Reng kha satna felna le dikna’n roi a rêl kârka inlal a ti.

²⁹Ruathartehai roiinpuina chu an hrâtna a nia, tarhai mahripomna chu an lu chuak hi a ni.

³⁰A kâra chu ei lampui fena indiktirna hrangin intakna tamtak irtem a nang ngai.